ރައްޔިތުންގެ އިތުބާރު ސަރުކާރަށް ގެއްލިފައިވާ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމްޑީޕީން ރޭ ކާނިވާ ސަރަހައްދުގައި ބޭއްވި ޖަލްސާގައި ވާހަަކަފުޅުދައްކަވަމުން ސޯލިހު ވިދާޅުވީ ސަރުކާރެއް ރައްޔިތުން އިންތިހާބު ކުރަނީ ކުރިއަށް ވުރެ ހެޔޮ ބަދަލުތަކެއް ބޭނުންވާތީ ކަމަށާއި ނަމަވެސް މި ސަރުކާރަށް އެއް އަހަރު ވެގެންދިޔައިރު ރައްޔިތުންގެ އިތުބާރު ސަރުކާރަށް ގެއްލިފައިވާ ކަމަށެވެ.
"ރައްޔިތުންގެ ތެރެއިން ދައްޗެއް އުނދަގުލެއް ދިމާ ނުވާ އެއްވެސް މީހަކު އެބަހުރިތޯ. މަސްވެރިންގެ ކަންބޮޑުވުންތައް އިންތިހާއަށް،" ސޯލިހު ވިދާޅުވި އެވެ.
ވިޔަފާރިތައް ހުއްޓުމަކަށް އައިސްފައިވާ ކަމަށާއި ރައްޔިތުންގެ އަތުގައި ފައިސާއެއް ނެތްއިރު، ޓެކްސީ ޑްރައިވަރުން މަގުމަތިކޮށްލާފައިވާ ކަމަށް ސޯލިހު ވިދާޅުވި އެވެ. އަދި ކޮންސްޓްރަކްޝަން އިންޑަސްޓްރީ ފުނޑާލާފައިވާ ކަމަށާއި މުވައްޒަފުންނަށް ދޭނެ ފައިސާއެއް އެމީހުންގެ އަތުގައި ނެތްއިރު، ޓޫރިޒަމް އިންޑަސްޓްރީ ވެސް ހާސްކަމެއްގެ ތެރެއަށް ވައްޓާލާފައިވާ ކަމަށް ވިދާޅުވި އެވެ.
މީގެއިތުރުން ބޯހިޔާވަހިކަމަށް ބޭނުންވެފައި ތިބި މީހުން "ގަން ހިންގަން" ފަށާފައިވާ ކަމަށާއި ފްލެޓާއި ގޯތި ލިބޭ ލިސްޓުގައި ވެސް މިހާރު އޮތީ "ވާނުވާ" ޖަހާފައި ކަމަށް ސޯލިހު ވިދާޅުވި އެވެ. މި ކަންބޮޑުވުންތަކުގެ އަޑު އެމްޑީޕީން އަޑު އަހާފައިވާ ކަމަށާއި މިފަދަ އެއްވުމެއް ބޭއްވީ އެ ސަބަބާއި ހުރެ ކަމަށްވެސް ވިދާޅުވި އެވެ.
ސޯލިހު ވިދާޅުވީ މި ސަރުކާރަށް އެއް އަހަރު ވެގެންދިޔައިރު އަމާޒު ހުރީ ހުދުމުހުތާރު ވެރިކަމެއް ގާއިމުކުރުމަށް ކަމަށެވެ. އެގޮތުން ބާރުތައް އިންތިހާ އަށް މުށުތެރެއަށް ލަމުންދާ ކަމަށާއި ރައްޔިތުންގެ މަޖިލީހުގެ ތެރޭގައި އޮތް ރައްޔިތުންގެ ބާރު މުޅިން ކަނޑުވާލާފައިވާއިރު، ސުޕްރީމް ކޯޓުގެ ފަނޑިޔާރުންގެ ބެންޗު ވެސް އަދި ބަދަލުކުރާނެ ކަމަށްވެސް ސޯލިހު ވިދާޅުވި އެވެ.
