މޯލްޑިވްސް ކަސްޓަމްސް ސާވިސްގެ ސައުތު ރީޖަނަލް ހެޑް އޮފީސް ރަސްމީކޮށް އައްޑޫ ސިޓީ މަރަދޫގައި ހުޅުވައިފިއެވެ.
ކަސްޓަމްސް އިން މިއަދު މީޑިއާތަަކަށް ބުނީ، ތިން ބުރީގެ އެ އިމާރާތުގައި އިދާރީ އޮފީހަކާއި ސްޓާފް އެކޮމޮޑޭޝަން ބައެއްގެ އިތުރުން ރީޖަނަލް ޓްރޭނިން ސެންޓަރެއް ހިމެނޭނެ ކަމަށެވެ.
ކަސްޓަމްސްގެ ސައުތު ރީޖަނަލް ހެޑް އޮފީސް އިމާރާތުގައި މިއަދު ބޭއްވި ހާއްސަ ރަސްމިއްޔާތެއްގައި އެ އޮފީސް ހުޅުއްވައިދެއްވީ ހޯމްލޭންޑް ސެކިއުރިޓީ މިނިސްޓަރު އަލީ އިހުސާނާއި ކޮމިޝަނާ ޖެނެރަލް އޮފް ކަސްޓަމްސް ފާތިމަތު ދިޔާނާއެވެ.
އެ ރަސްމިއްޔާތުގައި އިހުސާން ވިދާޅުވީ އައްޑޫ ސިޓީގެ ވިޔަފާރިތައް ފުޅާވެ، އެކްސްޕޯޓް އިމްޕޯޓް ކުރާ މިންވަރު އިތުރުވެގެންދާ އިރު، އައްޑޫ ސިޓީގައި ގާއިމުކުރި ކަސްޓަމްސްގެ ސައުތު ރީޖަނަލް ހެޑް އޮފީހުގެ ސަބަބުން، އެ ސާވިސްއިން ފޯރުކޮށްދޭންޖެހޭ ހިދްމަތްތައް އިތުރަށް ތަރައްގީވެގެންދާނެ ކަމަށެވެ.
"އަދި މި ރީޖަނަލް އޮފީހުގެ ސަބަބުން އައްޑޫ ސިޓީގެ ވިޔަފާރި ބަނދަރުތައް ބެލެހެއްޓުން އިތުރަށް ހަރުދަނާ ވެގެންދާނެ،" އިހުސާން ވިދާޅުވިއެވެ.
އެ ރަސްމިއްޔާތުގައި ދިޔާނާ ވިދާޅުވީ އަލަށް ހުޅުވި ކަސްޓަމްސް ސައުތު ރީޖަނަލް ހެޑް އޮފީސް އިމާރާތުގެ ސަބަބުން އައްޑޫ ސިޓީގައި ކަސްޓަމްސްގެ ހިދުމަތްތައް އިތުރަށް ހަރުދަނާވެ، ހިދުމަތްތައް އަވަސްވެގެންދިއުމާއެކު، އެ ސަރަހައްދުގައި ގާއިމުކޮށްފައިވާ ބަނދަރުތައް ބެލެހެއްޓުން އިތުރަށް ވަރުގަދަކުރެވިގެންދާނެ ކަމަށެވެ.
އެ އޮފީހުގައި މައިގަނޑުގޮތެއްގައި ކުރިއަށްދާނީ އައްޑޫ ސިޓީގެ އެކި ބަނދަރުތަކަށް ގެނެވޭ މުދަލުގެ ލިޔެކިޔުން ނިންމުމުގެ މަސައްކަތް ކަމަށާއި މުވައްޒަފުންނަށް ފުޅާދާއިރާއެއްގައި ތަމްރީން ޕްރޮގްރާމްތައް ހިންގުމަށް ހާއްސަ ކްލާސްރޫމްތަކާއި ކޮންފަރެންސް ހޯލެއް އަދި އެކޮމޮޑޭޝަން ބްލޮކެއް އެ އިމާރާތުގައި ގާއިމުކުރެވިފައިވާނެ ކަމަށް ދިޔާނާ ވިދާޅުވިއެވެ.
ކަސްޓަމްސްގެ ސައުތު ރީޖަނަލް ހެޑް އޮފީސް އިމާރާތުގެ މަސައްކަތް ފެށީ 2021 ގައި އެސްޖޭ ޓްރޭޑް ޕްރައިވެޓް ލިމިޓެޑްއާ ހަވާލުކޮށްގެނެވެ. އެ އިމާރާތަށް 22.3 މިލިއަން ރުފިޔާ، ދައުލަތުގެ ބަޖެޓުން ވަނީ ހަރަދުކޮށްފައެވެ.
އެ ރަސްމިއްޔާތުގައި ކޮމިޝަނާ އޮފް ޕޮލިސް އަލީ ޝުޖާއު، އައްޑޫ ސިޓީގެ މޭޔަރު އަލީ ނިޒާރު، އައްޑޫ ސިޓީއަށް ނިސްބަތްވާ ރައްޔިތުންގެ މަޖިލީހުގެ މެންބަރުންގެ އިތުރުން، ކަސްޓަމްސްގެ އިސްވެރިންނާއި އޮފިސަރުން ބައިވެރިވެވަޑައިގެންނެވިއެވެ.