ރައީސް ޑރ. މުހައްމަދު މުޢިއްޒު އއ. އަތޮޅާއި މާލެ އަތޮޅުގެ ބައެއް ރަށްތަކަށް ކުރެއްވި ދަތުރުފުޅު ނިންމަވާލެއްވުމަށްފަހު މިރޭ މާލެ ވަޑައިގެންފި އެވެ.
ރައީސުލްޖުމްހޫރިއްޔާ އިއްޔެ ފެއްޓެވި މިދަތުރުފުޅުގައި އިއްޔެ އެންމެ ފުރަތަމަ ވަޑައިގަތީ އއ، ތޮއްޑޫ އަށެވެ. އޭގެފަހުން އެ އަތޮޅު ރަސްދޫ އާއި އުކުޅަހަށް ވެސް ވަޑައިގަތެވެ.
މީގެއިތުރުން މިއަދު ރައީސް ވަޑައިގެންނެވީ މާލެ އަތޮޅުގެ ބައެއް ރަށްތަކަށެވެ. އެގޮތުން ވަޑައިގެންނެވީ ކ. ގާފަރާއި، ކ. ހުރާގެ އިތުރުން ކ. ހިންމަފުށްޓަށެވެ.
ރައީސްގެ މިދަތުރުފުޅުގައި ވަނީ އއ. އަތޮޅާއި މާލެ އަތޮޅުގެ ބައެއް ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މެންބަރުންނާ ބައްދަލުކުރައްވާ އެ ރަށްތަކުގައި ހުރި ރައްޔިތުން ބޭނުންވާ ކަންކަން އޮޅުންފިލުއްވާފަ އެވެ. އަދި ރައީސް ވަޑައިގެންނެވި ރަށްރަށުގައި ހުރި ސަރުކާރުގެ ބައެއް އިމާރާތްތަކަށް ވަޑައިގެން އެ ތަންތަންވެސް ރައީސް ބައްލަވާލެއްވި އެވެ.
ރާއްޖޭގެ ހުރިހާ ކައުންސިލްތަކާ ބައްދަލުކުރައްވައި މަޝްވަރާކުރެއްވުމަށް ރައީސުލްޖުމްހޫރިއްޔާ މިއަހަރު ފެށްޓެވި ސިލްސިލާ ދަތުރުފުޅުތަކުގައި، އަރިއަތޮޅު އުތުރުބުރިއާއި މާލެ އަތޮޅުގެ ބައެއް ރަށްތަކަށް މިކުރެއްވި ދަތުރުފުޅާއެކު މިހާތަނަށް އެމަނިކުފާނު ވަނީ ޖުމްލަ 185 ކައުންސިލަކާ ބައްދަލުކުރައްވާފަ އެވެ.
ރައީސުލްޖުމްހޫރިއްޔާ ކުރެއްވި މި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ މަތީފަންތީގެ ވަފުދެއްވެސް ބައިވެރިވެވަޑައިގެންނެވި އެވެ.
