ދައުލަތުގެ މާލީ ނިޒާމު ހަރުދަނާ ކުރުމުގެ ގޮތުން ދައުލަތުގެ އެކިއެކި ދާއިރާތައް ރިފޯމް ކުރުމާ ބެހޭ މަސައްކަތްތައް ހަލުވި ކުރުމަށްޓަކައި އުފައްދާފައިވާ އިކޮނޮމިކް ރިފޯމް އޮފީހުގެ "ކޮމިޝަނާ އޮފް ރިފޯމް"ގެ މަގާމަށް ހއ. އިހަވަންދޫ، ވައިޖެހޭގެ، އަސްމާ ޝަފީއު އައްޔަންކޮށްފި އެވެ.
އަސްމާ އެންމެ ފަހުން ހުންނެވީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގެ ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމުގައެވެ.
މީރާގައި 14 އަހަރު ހިދުމަތް ކުރައްވާފައިވާ އަސްމާ، ކޮމިޝަނާ އޮފް ރިފޯމްގެ މަގާމަށް އައްޔަންކުރީ ދެ އަހަރުގެ މުއްދަތަކަށެވެ.
ކޮމިޝަނާ އޮފް ރިފޯމް ރިޕޯޓް ކުރަންޖެހެނީ ސީދާ ފިނޭންސް މިނިސްޓަރަށެވެ. އަދި މިނިސްޓަރަށް ބޭނުންވާ ލަފާ ދެއްވުންވެސް ކޮމިޝަނާގެ ޒިންމާގެ ތެރޭގައިވެ އެވެ.
ފިނޭންސް މިނިސްޓްރީގެ ދަށުން ހިންގާ އިކޮނޮމިކް ރިފޯމް އޮފީހަށް "ކޮމިޝަނާ އޮފް ރިފޯމް"ގެ މަގާމަށް ބޭފުޅަކު ހޯދަން ކުރި އިއުލާންގެ މުއްދަތު ހަމަވީ މިމަހުގެ އަށްވަނަ ދުވަހު އެވެ.
.
ކޮމިޝަނާ އޮފް ރިފޯމްއަށް ލިބިވަޑައިގަންނަވާ މުސާރަ އާއި އިނާޔަތްތައް ސަރުކާރުން ހާމަކޮށްފައެއް ނުވެ އެވެ.
ކޮމިޝަނާ އޮފް ރިފޯމްގެ މައިގަނޑު ޝަރުތުތައް
- އެކައުންޓިން އަދި ފައިނޭންސްގެ ދާއިރާ އިން ޑިގްރީއެއް އޮތުން
- މަސައްކަތާ ގުޅޭ ދާއިރާ އިން 10 އަހަރުގެ ތަޖުރިބާ ހުރުން
- ގައުމީ އަދި ބައިނަލްއަގްވާމީ ފެންވަރުގައި ހޯދާފައިވާ ތަޖުރިބާ
- ސިޔާސަތު ކަނޑައެޅުމާއި ހިންގުމުގެ ދާއިރާގައި ހުރި ތަޖުރިބާ
ރައީސް ޑރ. މުހައްމަދު މުއިއްޒުގެ ސަރުކާރުން ވަނީ އިގްތިސާދީ ދާއިރާ އިސްލާހުކުރުމަށްޓަކައި ވަރުގަދަ ފިޔަވަޅުތަކެއް އެޅުމަށް ނިންމާފަ އެވެ. އެގޮތުން ދައުލަތުގެ ކުންފުނިތައް އެއްކޮށްލުމާއި ކޮންމެހެން އުވާލަންޖެހޭ ތަންތަން އުވާލުމާއި ސަބްސިޑީ ދިނުމުގެ އުސޫލު އިސްލާހުކުރުމާއި އާސަންދަ ހަމަޖައްސައިދޭ އުސޫލު އިސްލާހުކުރުން ފަދަ ކަންކަން ހިމެނެ އެވެ.
