ފަލަސްތީނަށް ބޭނުންވާ އިންސާނީ އެހީ ފޯރުކޮށް ދިނުމާ ބެހޭގޮތުން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިސްތިޝާރީ ލަފައަކަށް އެދި ހުށަހެޅި ގަރާރަށް ރާއްޖެ ހިމެނޭހެން 137 ގައުމަކުން ތާއީދުކޮށް ގަރާރު ފާސްކޮށްފިއެވެ.
ފަލަސްތީނަށް ބޭނުންވާ އިންސާނީ އެހީ ފޯރުކޮށްދިނުމާ ބެހޭގޮތުން އިޒްރޭލުން އުފުލަންޖެހޭ ޒިންމާތަކާ ބެހޭގޮތުން އައިސީޖޭގައި އިސްތިޝާރީ ލަފައަކަށް އެދި ހުށަހެޅި ގަރާރު މިދިޔަ ބުރާސްފަތި ދުވަހު އދގެ އާއްމު މަޖިލީހުން ވަނީ ފާސްކޮށްފައެވެ.
މި ގަރާރު ހުށަހަޅާފައި ވަނީ ނޯވޭގެ އިސްނެގުމާއެކު، އެހެން ގައުމުތައް ހިމެނޭ ގްރޫޕަކުންނެވެ. ފޮރިން މިނިސްޓްރީން ބުނީ، ރާއްޖެއިން އެ ގަރާރު ކޯ ސްޕޮންސާކޮށްފައިވާ ކަމަށާއި، އެ ގަރާރު ފާސްކޮށްފައި ވަނީ ރާއްޖެ ހިމެނޭހެން 137 މެންބަރު ގައުމުގެ ވޯޓާ އެކުގައި ކަމަށެވެ. މިއީ އދ އާއި ބައިނަލްއަގްވާމީ ޖަމިއްޔާތަކާއި އެހެން ގައުމުތަކުން ފަލަސްތީނުގެ ރައްޔިތުންނަށް އެހީތެރިކަން ފޯރުކޮށް ދިނުމަށް ކުރަމުންދާ މަސައްކަތްތައް ދަމަހައްޓަން އެޅޭ މުހިންމު ފިޔަވަޅެއް ކަމަށް ފޮރިން މިނިސްޓްރީން ބުނެއެވެ.
މި ގަރާރަށް ލިބިފައިވާ ތާއީދަކީ، 1967 ވަނަ އަހަރުގެ ކުރިން އޮތް އިންތަކުގެ މައްޗަށް ބިނާކޮށް ފަލަސްތީނުގެ މިނިވަން އަދި ސިޔާދަތީ ދައުލަތެއް ޣާއިމު ކުރުމަށް ކުރަމުންދާ މަސައްކަތަށް ލިބިގެންދާ ބާރެއް ކަމަށް ވެސް އެ މިނިސްޓްރީން ބުނެއެވެ
މިދިޔަ އަހަރުގެ އޮކްޓޫބަރު 8، އިން ފެށިގެން ގާޒާއަށް ވަދެގަނެ، އިޒްރޭލުން ހިންގަމުންދާ ލާ އިންސާނީ އަނިޔާތަކުގައި 43،000 އަށް ވުރެ ގިނަ މީހުން ވަނީ ޝަހީދުވެފައެވެ. އަދި ހަނގުރާމަ ފެށުނީއްސުރެ ވެސް ފަލަސްތީނުގެ ދިފާއުގައި ރާއްޖެއިން ވަކާލާތު ކުރަމުންދާ އިރު ސައުދީ އަރަބިއްޔާގެ ވެރިރަށް ރިޔާޟްގައިކުރިއަށް ދިޔަ ޖޮއިންޓް އަރަބް އިސްލާމިކް ސަމިޓުގައި ވެސް ފަލަސްތީނުގެ މިނިވަން ކަމާ ގުޅޭ ގޮތުން ރައީސް ޑރ. މުހައްމަދު މުއިއްޒު ވަނީ ވާހަކަފުޅު ދައްކަވާފައެވެ.
އެގޮޮތުން އިޒްރޭލުން ހިންގަމުންދާ ގަތުލުއާންމުގެ މައްސަލައިގައި ބައިނަލްއަގުވާމީ ބޮޑެެތި ގައުމުތަކުން ހަނުހުރެ، އިހުމާލުވެފައިވާތީ އެކަންވެސް ރައީސް އޭރު ފާހަގަ ކުރެއްވިއެވެ. ހަމައެހެންމެ އެމަނިކުފާނު ވަނީ އދ ގެ ސަލާމަތީ ކައުންސިލަށް ލިބިދީފައިވާ ވީޓޯގެ ބާރުގެ ސަބަބުން ފަލަސްތީނުގައި ހިންގަމުންދާ ގަތުލުއާންމު ހުއްޓުވުމަށް ފިޔަވަޅު ނޭޅި، އިޒްރޭލަށް ހަތިޔާރު ފޯރުކޮށްދިނުން ހުއްޓުވިފައިނުވާ ކަން ފާހަގަކުރައްވައިފައެވެ.
