އެޗްޑީސީގެ ތެރޭގައި ހިންގަމުން ދިޔަ ހިޔާނާތުގެ ބޮޑެތި މައްސަލަތައް ފާހަގަކޮށް އެ ކުންފުނީގެ ކުރީގެ ޗެއާމަން އަހްމަދު ޒުހޫރު ފޮނުއްވި ސިޓީ ލިބިވަޑައިގެންފައި ނުވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް އޮފީހުގެ ބޭރުގައި ބައެއް ނޫސްވެރިންގެ ސުވާލުތަކަށް ޖަވާބު ދެއްވަމުން ރައީސް ވިދާޅުވީ، ސަރުކާރުގެ ތެރޭ ހިނގާ ކޮރަޕްޝަންގެ އަމަލުތައް ހުއްޓުވުމުގައި އެމަނިކުފާނު ފަހަތަށް ޖެހިވަޑައިނުގަންނަވާނެ ކަމަށާއި، ބޭނުންފުޅު ވަނީ ކޮރަޕްޝަނާ ދުރު ސަރުކާރަކަށް މި ސަރުކާރު ހެއްދެވުމަށް ކަމަށެވެ. އެމަނިކުފާނު ވިދާޅުވީ ކަންކަން އެނގިވަޑައިގަންނަވާ ހިސާބުން ފިޔަވަޅު އަޅުއްވާފައި ވާނެ ކަމަށެވެ."ސިޓީއެއް އަޅުގަނޑަށް ލިބި، އަމަލުނުކޮށް އޮތް ކަމަށް ބުނެ ދައްކާ ވާހަކައަކީ ހަގީގީ ވާހަކައެއް ނޫން،" ރައީސް ވިދާޅުވި އެވެ.
އެމަނިކުފާނު ވިދާޅުވީ އެކި އިދާރާތަކުގެ ތެރޭގައި ގާނޫނާއި ގަވައިދާ ހިލާފަށް ހިންގާ ބައެއް ކަންކަމުގެ މައުލޫމާތު ލިބިވަޑައިގަތުމާ އެކު މީގެކުރިންވެސް ފިޔަވަޅު އަޅުއްވާފައިވާނެ ކަމަށެވެ. އަދި އެ މައްސަލައެއް ބެލުމަށް އަންގަންޖެހޭ އިދާރާތަކަށް އަންގަމުންދާ ކަމަށްވެސް ވިދާޅުވި އެވެ.
ރައީސް ވިދާޅުވީ އެޗްޑީސީގެ ތެރޭގައި ހިންގާފައި ހުރި ހިޔާނާތުގެ މައްސަލަތައް އެނގުނު ހިސާބުން އެކަމުގައިވެސް ފިޔަވަޅު އަޅުއްވާ އަދި މައްސަލަ ބެލުމަށް ފުލުހުންނަށް އެންގެވި ކަމަށެވެ.
"އަޅުގަނޑު މަގާމުތަކަށް މީހުން ލަނީ ވައްކަންކުރާ ކަށް ނޫން، ކޮރަޕްޝަން ހިންގާކަށް ނޫން، ގަވައިދާ ހިލާފު ކަމެއް ކުރާކަށް ވެސް ނޫން، އޭގެ ބަދަލުގަ ތެދުވެރިކަމާއި އަމާނާތްތެރިކަމާ އެކީގަ ރައްޔިތުންނަށް ހިދުމަތް ދިނުމަށް،" ރައީސް ވިދާޅުވިއެވެ.
އެމަނިކުފާނު ވިދާޅުވީ ދައުލަތުގެ އެކި މަގާމުތަކަށް ބޭފުޅުން ހަމަޖައްސަނީ ކޮރަޕްޝަނާއި ފަސާދައިގެ އަމަލުތައް ހިންގަން ނޫން ކަމަށާއި އެހެންކަމުން އެފަދަ އަމަލުތައް ހިންގާނަމަ ވަކި ބޭފުޅަކަށް ބެލުމެއް ނެތި ފިޔަވަޅު އަޅައި މަގާމުންވެސް ވަކިކުރާނެ ކަމަށެވެ.
ޒުހޫރު ފޮނުއްވި ކަމަށް ބުނާ ސިޓީ ލިބިވަޑައިނުގަންނަވާ ކަމަށް ރައީސް ވިދާޅުވިއިރު ހަތް ސަފްހާގެ އެ ސިޓީގައި ޒުހޫރު ވަނީ އިއްޔެގެ ނިޔަލަށް އެޗްޑީސީގެ ޗެއާމަންގެ މަގާމުގައި ހުންނެވި ފަޒުލް ރަޝީދު ހިންގަވަމުން ގެންދެވި ކަމަށް ބުނާ ހިޔާނާތާއި ފަސާދައިގެ އެތައް އަމަލެއް ފާހަގަކުރައްވާފަ އެވެ.
