ނަމާދަށް ލޯބި ޖެއްސުމުގެ ޕްރޮގްރާމް އިސްލާމިކް މިނިސްޓްރީން މިއަދު އިފްތިތާހުކޮށްފި އެވެ.
އިސްލާމިކް މިނިސްޓްރީގައި ބޭއްވި ރަސްމިއްޔާތެއްގައި އެ މިނިސްޓްރީގެ އަންނަ އަހަރުގެ އެކްޝަން ޕްލޭނާއި، އެކްޓިވިޓީ ކަލަންޑަރު، ރިސާލަތު ޕްރޮގްރާމް 2025 އަދި ނަމާދު މަތިވެރިކުރުމުގެ ޕްރޮގްރާމް ވަނީ އިފްތިތާހުކޮށްފަ އެވެ.
މި ރަސްމިއްޔާތުގައި ވާހަކަދައްކަމުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ މި ޕްރޮގްރާމް ކުރިއަށް ގެންދިޔުމަށް ހަމަޖެހިފައިވަނީ ތަފާތު ގޮތަކަށް ކަމަށާއި މި ޕްރޮގްރާމްގެ ތެރެއިން ކުރިއަށްދާނީ ހަމައެކަނި ފިގުހީ ވާހަކަތައް ކިޔައިދިނުން ނޫން ކަމަށެވެ. މި ޕްރޮގްރާމްގެ ތެރެއިން ނަމާދުކުރަން ހަނދާންކޮށްދިނުމާއި، ނަމާދުގައި ހިމެނޭ ދުއާތަކުގެ މާނަތައް މީހުންނަށް ދަސްކޮށްދިނުމާއި، ނަމާދުގައި ހިމެނޭ މާތްﷲ ގެ އިސްމުފުޅުތަކުގެ މާނަތައް މީހުންނަށް ކިޔައިދިނުން ހިމެނޭނެ ކަމަށް ޝަހީމް ވިދާޅުވި އެވެ.
އަދި ނަމާދާއި ބެހޭގޮތުން ވާރިދުވެފައިވާ މާތް ހަދީސްފުޅުތައް ކިޔައިދިނުމުގެ އިތުރުން ނަމާދަށް ލޯބި ޖެއްސުން ހިމެނޭ ކަމަށްވެސް ޝަހީމް ވިދާޅުވި އެވެ. އެގޮތުން ނަމާދު ފަދަ އަޅުކަންތައްތަކަކީ ހިތްތަކުގައި ލޯބި ޖައްސައިގެން އަދާކުރަންޖެހޭ ފަދަ އަޅުކަންތައްތަކެއް ކަމަށް ވިދާޅުވި އެވެ.
"އެއްވެސް ހާލެއްގައި މަޖުބޫރުކޮށްގެން، ތަޅައިގެން، އަނިޔާކޮށްގެން ކުރަންޖެހޭ ކަންކަމެއް ނޫން މިއިކީއެއް. ލޯބި ޖައްސައިގެން، އެއަށް ލޯބިން ކުރަންޖެހޭ ކަންތައްތަކެއްގެ ގޮތުގައި ނަމާދާއި ދީނުގައި ހުންނަ އެހެން އަޅުކަންތައްތައް ވެސް ކުރަންޖެހޭނީ،" ޝަހީމް ވިދާޅުވި އެވެ.
މީގެއިތުރުން އަންނަ އަހަރު ވަގުފް ބިލްޑިންތައް އާރާސްކުރެވި ޒަކާތު ހައުސްގެ ބިލްޑިން އެޅި ވަރަށް އައު ކަންތައްތަކެއްގެ ތެރެއަށް އިސްލާމިކް މިނިސްޓްރީ ވަދެގެންދާނެ ކަމަށްވެސް ޝަހީމް ވިދާޅުވި އެވެ. މި މަސައްކަތްތައް ކުރެވެނީ އެކުވެރިކަމާއެކު ރާއްޖޭގެ އިލްމުވެރިންނާއި އިސްލާމީ ޖަމްޢިއްޔާތަކާއި ރާއްޖޭގެ އެކި ކަންކޮޅުތަކުގައި ތިއްބެވި އިމާމުންނާއި ހުރިހާ ކައުންސިލްތަކުން ގުޅިގެން ކަމަށް ވިދާޅުވި އެވެ.
ނިމިގެން މިދާ އަހަރަކީ ހުރިހާ ގޮތަކުން ވެސް ކާމިޔާބު އަހަރެއް ކަމަށާއި މި އަހަރަކީ ތާރީޚުގައި ޒަކާތު ފަންޑަށް އެންމެ ގިނަ އަދަދަކަށް ފައިސާ ލިބިގެންދިޔަ އަހަރަށްވާއިރު ގިނަ އަދަދަކަށް ޤުރްއާން ހިތުދަސްކުރި ޙާފިޒުން ނެރެވުނު އަހަރެއްކަމާއި އަދި ރާއްޖޭގެ ތާރީޚުގައި އިސްލާމީ ގޮތުން ފާހަގަކުރެވޭ މުހިންމު މަސައްކަތަކެއް ކުރެވުނު އަހަރެއް ކަމަށްވެސް ޝަހީމް ވިދާޅުވި އެވެ.
