ގދ. ތިނަދުގެ ސިޓީގެ ދަރަޖަ ބާތިލުކުރުމަށް އެދި ހުށަހެޅުނު ދުސްތޫރީ މައްސަލަ ބަލައިނުގަތުމަށް ހައި ކޯޓުން ނިންމައިފައެވެ. މި މައްސަލަ ހުށަހެޅުއްވީ އެންވަޔަރަންމަންޓް މިނިސްޓްރީގެ ކުރީގެ ޑެޕިއުޓީ މިނިސްޓަރު އަދި ގާނޫނީ ވަކީލު މުހައްމަދު ރާގިބެވެ.
ހައިކޯޓުގެ ރަޖިސްޓްރާ މަރިޔަމް ހޫރުޝީދާ އިއްޔެ ނިންމެވި ނިންމެވުމުގައި ބުނެފައިވަނީ ތިނަދޫއަށް ގަރާރެއްގެ ދަރަޖަ ދިނުމަށް ކުރީގެ ރައީސް އިބްރާހީމް މުހައްމަދު ސޯލިހް ނެރުއްވި ގަރާރަކީ މަޖިލީހުން ފާސްކޮށްފައިވާ މަސްދަރެއް ނުވަތަ ގާނޫނަކުން ބާރުލިބިގެން އެ ގާނޫނުގެ އިމުގެ ތެރެއިން އެކުލަވާލާފައިވާ މަސްދަރެއްކަން ރާގިބް ހުށަހެޅުއްވި މައްސަލައިގައި ބުނެދެވިފައި ނުވާ ކަމަށެވެ. އެހެންކަމުން އެއީ ހައިކޯޓަށް ދުސްތޫރީ މައްސަލަތައް ބެލުމަށް އޮންނަ އިހްތިސާސްގެ ތެރޭގައި ބެލޭނެ މައްސަލައެއް ނޫން ކަމަށް ރަޖިސްޓްރާ ނިންމަވާފައިވެ އެވެ.
ރިޔާސީ ކެމްޕޭނުގެ ތެރޭގައި ސޯލިހުގެ ފަރާތުން ތިނަދުއަށް ސިޓީގެ ދަރަޖަ ދެއްވާފައިވާއިރު، އޭރުގެ ތަފާސްހިސާބުތަކުން ދައްކާގޮތުގައި ތިނަދޫގެ އާބާދީއަކީ 8،000 އެވެ. އޭގެ ތެރެއިން ރަށުގައި ދިރިއުޅެނީ 5،000 އެއްހާ މީހުންނެވެ. އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި ބަޔާންކޮށްފައިވާ ގޮތުން ސިޓީއެއްގެ ދަރަޖަ ދިނުމަށް އާބާދީ 10،000 އަށްވުރެ މަތިވާންޖެހެއެވެ.
ހައި ކޯޓުގެ ރަޖިސްޓްރާގެ ނިންމެވުމުގައި ވިދާޅުވެފައިވަނީ ދުސްތޫރީ މައްސަލަތަކުގެ ތެރެއިން ހައި ކޯޓަށް ބެލޭނީ ހަމައެކަނި ގާނޫނެއް ނުވަތަ ގާނޫނެއްގެ ބައެއް ގާނޫނުއަސާސީއާ ފުށުއަރާ މައްސަލަތައް ކަމަށެވެ. ރައީސުލްޖުމްހޫރިއްޔާގެ ގަރާރަކީ ގާނޫނީ މަސްދަރެއް ނޫން ކަމަށާއި، މިފަދަ މައްސަލަތައް ދުސްތޫރީ ގޮތުން ނުބެލޭނެ ކަމަށް ސުޕްރީމް ކޯޓުން ވެސް ކަނޑައަޅުއްވާފައިވާ ކަމަށް ފާހަގަކުރެއްވިއެވެ.
މި މައްސަލައިގައި ކައުންސިލާއި ކުރީގެ ރައީސް ސޯލިހުގެ މައްޗަށް ދައުލަތުގެ ލިޔުމެއް އޮޅުވާލައި، ދޮގު މައުލޫމާތު ދިނުމުގެ ތުހުމަތުގައި މައްސަލަ ބެލުމަށް ހުށަހަޅުއްވާފައިވާ ކަމަށާއި، މި މައްސަލަ ވަނީ ރައްޔިތުންގެ މަޖިލީހަށް ވެސް ހުށަހަޅުއްވާފައެވެ. މި މައްސަލަ ރައީސް އޮފީހާ ދެކޮޅަށް ހުށަހެޅުމާއި ގުޅިގެން ރާގިބު ވަނީ ސަރުކާރުގެ މަގާމުން ވަކި ކޮށްފައެވެ.
