ނ. މިލަދޫ ސޯސަންގެ މުހައްމަދު ނައުޝާދު އަނެއްކާވެސް ވައްކަމުގެ މައްސަލައެއްގައި ހައްޔަރުކުރެވިއްޖެއެވެ.
އޭނާގެ މައްޗަށް ތުހުމަތުކުރެވޭ މައްސަލައިގައި، އިސްގާޒީ އާދަމް މުހައްމަދު ވަނީ 15 ދުވަހުގެ މުއްދަތަށް ބަންދުކުރުމަށް އަމުރުކުރައްވާފައެވެ. ބަންދު އަމުރުގެ ރިޕޯޓުގައިވާ ގޮތުން ނައުޝާދު ވަނީ އޭނާގެ މައްޗަށް ކުރެވޭ ތުހުމަތުތައް ދޮގުކޮށްފައެވެ.
ނައުޝާދަކީ މީގެ ކުރިންވެސް 100 އަށްވުރެ ގިނަ ފަހަރު ކުދިކުދި ކުށްތަކުގައި ހައްޔަރުކުރެވި ބަންދުކުރެވިފައިވާ މީހެކެވެ. ކްރިމިނަލް ކޯޓުގެ ގާޒީ މުހައްމަދު މިސްބާހު ކުރިން ވިދާޅުވެފައިވާ ގޮތުގައި، ނައުޝާދަކީ މަސްތުވާތަކެއްޗާއި ވައްކަންފަދަ ކުށްތައް ތަކުރާރުކޮށް ކުރަމުންދާ މީހެކެވެ. މިފަދަ މީހުންނަށް މިހާރުގެ އާންމު ޖިނާއީ ނިޒާމުގެ ތެރެއިން ދެވޭ އަދަބަކީ އެފަދަ މީހުން އިސްލާހުކުރުމަށް އެކަށީގެންވާ އަދަބެއް ނޫންކަމަށް ގާޒީ މިސްބާހު ދެކެވަޑައިގަންނަވައެވެ.
ގާޒީ މިސްބާހުގެ ނަޒަރުގައި، މިފަދަ މީހުން މުޖުތަމަޢުން އެކަހެރިކޮށް، ޚާއްޞަ އިސްލާހީ ނިޒާމެއްގެ ދަށުން ބަހައްޓައި، އެމީހުން އިސްލާހުވެ، މުޖުތަމަޢަށް ފައިދާހުރި މަސައްކަތެއް ދަސްކޮށް، އަމިއްލަ ދިރިއުޅުމެއް އުޅެވޭވަރުވަންދެން ބަހައްޓަންޖެހެއެވެ. އޭގެ ފަހުން އެމީހުން މުޖުތަމަޢަށް ދޫކުރެވިދާނެ ކަމަށް ގާޒީ މިސްބާހު ދެކެވަޑައިގަންނަވައެވެ.
