ފޮރިން މިނިސްޓަރު ޑރ. އަބްދުﷲ ހަލީލް އިންޑިއާއަށް ކުރައްވާ ރަސްމީ ދަތުރުގެ ތެރެއިން، އިންޑިއާގެ ހިލޭ އެހީގެ ދަށުން ރާއްޖޭގައި ޕްރޮޖެކްޓުތަކެއް ހިންގަން އެއްބަސްވުމެއްގައި ސޮއިކޮށްފި އެވެ.
އޭގައި އިއްޔެ ރާއްޖޭގެ ފަރާތުން ސޮއިކުރެއްވީ މިނިސްޓަރު ހަލީލެވެ. އިންޑިއާގެ ފަރާތުން ސޮއިކުރެއްވީ އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރެވެ.
ނަމަވެސް މި އެއްބަސްވުމާ ގުޅޭ ތަފްސީލެއް އަދި ހާމަކޮށްފައެއް ނުވެ އެވެ.
ފޮރިން މިނިސްޓަރު ހަލީލް އިންޑިއާ އަށް ކުރައްވާ ދަތުރުފުޅުގެ ތެރެއިން ޖައިޝަންކަރުގެ އިތުރުން އިންޑިއާގެ އިސްވެރިންނާ އެކު ރަސްމީ މަޝްވަރާތައް ބާއްވާފައިވެ އެވެ. އެގޮތުން އިއްޔެ ބޭއްވި މަޝްވަރާތަކުގެ ތެރެއިން ދެ ގައުމުގެ ގުޅުން ބަދަހިވަމުން އަންނަ ކަމަށް ޖައިޝަންކަރު ވިދާޅުވި އެވެ. އަދި ކުރިއަށް އޮތް ތަނުގައި ވެސް ގުޅުން އިތުރަށް ވަރުގަދަވާނެ ކަމަށް އޭނަ ވިދާޅުވި އެވެ.
އެ ބައްދަލުވުމުގައި ހަލީލު ވަނީ ދެ ގައުމުގެ ދެމެދުގެ އޮތް ގުޅުމުގެ މައްޗަށް އަލިއަޅުވާލައި ވާހަކަ ދައްކަވައި، އިންޑިއާއިން އަބަދުވެސް ރާއްޖެއަށް ދެމުން އަންނަ އެހީތެރިކަމަަށް ޝުކުރުވެރިވާ ކަމަށް ވިދާޅުވެފަ އެވެ.
ހަލީލުގެ މި ދަތުރަކީ މިދިޔަ ސެޕްޓެމްބަރުގައި ފޮރިން މިނިސްޓަރުކަމާ ހަވާލުވެވަޑައިގެން ފަހުން އިންޑިއާއަށް ކުރައްވާ ފުރަތަމަ ރަސްމީ ދަތުރެވެ.
އިންޑިއާގެ އެންމެ އަވައްތެރި ގައުމުގެ ގޮތުގައި އޮތް އިންޑިއާ އިން އަބަދު ވެސް އެތައް ގޮތަކުން ރާއްޖެ އަށް އެހީވަމުން އަންނަ އިރު، މިހާރު ވެސް އެ ގައުމުުގައި ހިންގާ ބޮޑެތި މަޝްރޫއުތަކެއް ކުރިއަށް އެބަދެ އެވެ. އޭގެ ތެރެއިން އެންމެ ބޮޑު ޕްރޮޖެކްޓަކީ ތިލަމާލެ ބްރިޖެވެ.
