މަސްތުވާތަކެތީގެ ވަބާގައި ޖެހިފައި ތިބޭ މީހުންނަށް ފަރުވާދޭ ކައުންސިލަރުން ބިނާކުރުމުގެ މަސައްކަތްތަކާ ގުޅޭ ގޮތުން ނެޝަނަލް ޑްރަގް އެޖެންސީ އެމްޑީއޭ) އިން މަޝްވަރާކޮށްފިއެވެ.
މިކަމާ ގުޅޭގޮތުން އެތަނުގެ ޗެއާޕާސަން ލުބްނާ ޒާހިރު ވިދާޅުވީ ހެލްތު މިނިސްޓްރީ އާއި އެލައިޑް އިންޝުއަރެންސް އާއެކު ކުރިއަށް ގެންދިޔަ މަޝްވަރާގެ ބައްދަލުވުމުގެ ބޭނުމަކީ ރާއްޖޭގެ ހުރިހާ ރަށެއްގައި ވެސް މަސްތުވަތަކެތީ ވަބާގައި ޖެހިފައި ތިބޭ މީހުންނަށް ފަރުވާދޭ ކައުންސިލަރުން ބިނާކުރުން ކަމަށެވެ.
އޮންލައިންކޮށް ކުރިއަށްގެން ދިޔުމަށް ނިންމާފައިވާ މި ޕްރޮގްރާމުގެ ބައެއް ބައިތައް ކްލާސްތަކަށް ހާޒިރުވެ ކުރިއަ ށްގެންދިޔުމަށް ނިންމާފައިވާ ކަމަށް ވެސް ލުބްނާ ވިދާޅުވި އެވެ.
"އިރާދަކުރެއްވިއްޔާ މި މަސައްކަތުގެ ދަށުން ރާއްޖޭގެ ހުރިހާ ރަށެއްގައި ވެސް އެޑިކްޝަން ކައުންސިލަރުން ބިނާކުރާނަން." އޭނަ ވިދާޅުވިި އެވެ.
ވޭތުވެދިޔަ 12 ވަރަކަށް އަހަރު ދުވަހުގެ ތެރޭގައި ނެޝެނަލް އިންސްޓިޓިއުޓް ފރ ރިސާޗް އެންޑް އެޑިކްޝަންސް ސްޓަޑީޒް އިން އެއްވެސް މަސައްކަތެއް ހިންގާފައި ނުވާކަން ފަހަގަކުރައްވައި ލުބްނާ ވިދާޅުވީ އިންސްޓިޓިއުޓްގެ މަސައްކަތްތައް ފުޅާ ކުރުމަށްޓަކައި މަސައްކަތް ފަށާފައިވާ ކަމަށެވެ. އަދި އިންސްޓިޓިއުޓްގެ މަސައްކަތްތަކުގެ ތެރޭގައި މަސްތުވާތަކެތީގެ މައްސަލައިގެ ހާލަތު ދެނެގަތުމަށް ހަދަން ޖެހޭ ދިރާސާގެ މަސައްކަތް ހިމެނޭ ކަމަށާއި އެހެންކަމުން އެންޑީއޭގައި ހުރި ޑާޓާގެ ބޭނުން މި އަހަރުގެ ތެރޭގައި ހިފާނެ ކަމަށްވިދާޅުވިއެވެ.
މިކަމާ ގުޅޭ ގޮތުން އެންޑީއޭގެ އެކްޓިން ސީއީއޯ މުހައްމަދު ރާޝިދު ވިދާޅުވީ ރާއްޖޭގެ ހުރިހާ ހިސާބެއްގައި މަސްތުވާތަކެތީގެ މައްސަލަތައް ފުޅާވަމުން އަންނަ ކަމުގެ މައުލޫމާތު ލިބެމުން އަންނަ ކަމަށާއި ފަރުވާގެ ކަންކަމުގެ ޒިންމާއާ ހަވާލުވެތިބި ބައެއްގެ ހައިސިއްޔަތުން މިހާރު ޕޮލިސީ ލެވެލްގަ ވިސްނުން ހުރީ ކޮމިއުނިޓީގައި ކުދިން ބައިތިއްބައިގެން ކޮމިއުނިޓީއަށް ރީއިންޓަރގްރޭޓް ކުރެވޭނެ ގޮތަށް ފަރުވާގެ ބައެއް އިތުރުކުރުން ކަމަށެވެ.
"ފާހަގަވަނީ އެ މީހެއްގެ ރަށުގަ ބައިތިއްބައިގެން ކުރިއަށްގެންދާއިރު އެ މީހުންނަށް ބޭނުންވާ، ޚާއްސަކޮށް ކައުންސިލިން ނުވަތަ އެނޫންވެސް ސައިކޯސޯޝަލް ސަޕޯޓް ދެވޭނެ ގޮތްތަކެއް ނެތްކަން،" އޭނަ ވިދާޅުވި އެވެ. "އެ ފެންވަރުގެ ނުވަތަ ސެޝަނެއް ނަގައިދެވޭނެ ފެންވަރުގެ މީހުން މި ދާއިރާއިން ތަމްރީނުވެފައި ނެތްކަން."
ރާޝިދު ވިދާޅުވީ ގިނަ ފަހަރަށް މިކަހަލަ ކަންކަމަކީ ފޯނުން ނުވަތަ އޮންލައިންކޮށް ނިންމާލެވޭ ވަރަށް ވުރެ އުނދަގޫ ކަންކަން ކަމަށާއި ޚާއްސަކޮށް ޒާތީ ވިސްނުމާއި ބިހޭވިއަ މޮޑެފައިވާން ޖެހޭ ކަމަކަމަށްވާތީ ކައިރިން ސަޕޯޓް ބޭނުންވާ ކަމަށް ވިދާޅުވި އެވެެ.
"އެހެންކަމުން އެކަން އަޅުގަނޑުމެންނަށް ފާހަގަކުރެވި ބޭނުންވާ ވަސީލަތްތައް ނެތްކަން އަޅުގަނޑުމެންނަށް ގަބޫލުކުރެވުނީމަ ހެލްތު މިނިސްޓްރީ އާއި އެލައިޑް އިންޝުއަރެންސް އާއެކު މި ވަނީ މަޝްވަރާކޮށްފައި." އޭނަ ވިދާޅުވި އެވެ.
މަސްތުވާތަކެތި ބޭނުންކުރާ މީހުންނަށް ހެލްތު ފެސިލިޓީތައް މެދުވެރިކޮށް އައުޓް ޕޭޝަންޓްގެ ޚިދުމަތް ދިނުމާ ގުޅޭ ގޮތުން ކުރެވުނު މަޝްވަރާއިން އުންމީދެއް ލިބިގެން ގޮސްފައިވާ ކަމަށް ވެސް ރާޝިދު ވިދާޅުވި އެވެ. އެގޮތުން ޑްރަގް ނަގާ މީހުންގެ ނަފުސާނީ މައްސަލަތައް ވަރަށް ބޮޑުކަމަށާއި ފަރުވާގެ ތެރެއަށް ވަންނަ ގިނަ ކުދިންނަކީ މެންޓަލީ މުޅިން ސްޓޭބަލް ކުދިން ނޫންކަން ފާހަގަވާ ކަމަށް ވެސް ވިދާޅުވިއެވެ.
އެޑިކްޝަން ކައުންސިލަރުން ބިނާކުރުމުގެ މަސައްކަތް ފަށަން ތައްޔާރުވަމުން އަންނަ އިރު ޑްރަގް ފަރުވާއަށް އެއްބާރުލުން ނުދޭ މީހުންނާ މެދު ޤާނޫނީ ފިޔަވަޅު އެޅުމުގެ މަސައްކަތްވެސް އެންޑީއޭ އިން ވަނީ ފަށައިފަ އެވެ.
އެ މަޝްވަރާގައި ވަނީ ޑްރަގް ކޯޓުގެ ދަށުން ފަރުވާއަށް ޙުކުމް ކުރެވި ފަރުވާ ތަންފީޛު ކުރަން ފެށުމަށް ފަހު އެއްބާރުލުން ނުދޭ ފަރާތްތަކަށް ޤާނޫނީ ފިޔަވަޅު އެޅުމާއި، ފަރުވާގެ ނިޒާމު އިތުރަށް ހަރުދަނާކުރުމަށް ނިންމައިފަ އެވެ.
ރާއްޖޭގައި މަސްތުވާތަކެތި ބޭނުންކުރާ 7،500 ވަރަކަށް މީހުން އުޅޭ ކަމަށް ދިރާސާތަކުން ދައްކަ އެވެ.
