އިސްލާމްދީނުގައި އަންހެންދަރީންނަށް ތަޢުލީމު ދިނުމާ ގުޅޭގޮތުން ޕާކިސްތާނުގެ އިސްލާމާބާދުގައި މުސްލިމް ވޯލްޑް ލީގް (ރާބިޠަތުލް ޢާލަމިލްއިސްލާމީ) އިން ބޭއްވި ބައިނަލްއަޤްވާމީ ކޮންފަރެންސްގައި އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ތަޤުރީރު ކުރައްވައިފިއެވެ.
އިލްމުވެރިންގެ ސެޝަންގައި ތަޤުރީރު ކުރައްވަމުން ވަޒީރު ފާހަގަކުރެއްވީ އިސްލާމްދީނަކީ އިލްމުގެ ދީންކަމާއި އެއީ އިންސާނީ ޙަޔާތުގެ އަސާސްކަމެވެ. އަދި އިސްލާމްދީނުގައި އިލްމު އުނގަންނައިދެނީ ހަމައެކަނި ފިރިހެނުންނަކަށް ނޫންކަމާއި، އަންހެނުންނަކީވެސް އިލްމުވެރި ބަޔަކަށް ހެދީ އިސްލާމްދީންކަން އެމަނިކުފާނު ވިދާޅުވިއެވެ. މިގޮތުން ކީރިތި ރަސޫލާގެ އަނބިކަނބަލުން ޢާއިޝަތުގެފާނަކީ އިލްމުވެރިކަމުގެ ނަމޫނާއެއްކަމަށާއި، ރަސޫލާގެ ޙަޔާތްޕުޅުގައި އަންހެނުންނަށް އިލްމު ދެއްވުމަށް ވަކި ވަގުތެއް ޚާއްޞަ ކުރެއްވިކަން ސާބިތުވާކަމަށް ވަޒީރު ވިދާޅުވިއެވެ.
ކޮންފަރެންސްގައި ވާހަކަފުޅު ދައްކަވަމުން، އިލްމު ފެތުރުމަށް ރާބިޠާއިންނާއި ސަޢޫދީ އަރަބިއްޔާގެ ސަރުކާރުން ކުރައްވާ މަސައްކަތްތަކަށް ޝުކުރު އަދާކުރެއްވިއެވެ. އަދި ޕާކިސްތާނާއި އިސްލާމީ އެހެނިހެން ޤައުމުތަކުން އިލްމު ފެތުރުމަށް ކުރައްވާ މަސައްކަތްތައްވެސް ވަޒީރު ފާހަގަކުރެއްވިއެވެ. މުސްލިމް ވޯލްޑް ލީގްގެ ސްޕްރީމް ކައުންސިލްގެ މެންބަރެއްގެ ހައިސިއްޔަތުން ޑރ. ޝަހީމް މި ކޮންފަރެންސްގައި ބައިވެރިވެވަޑައިގެންނެވިއެވެ.
