ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މިދިޔަ މެއި މަހުގެ ހަވަނަ ދުވަހު ދިން ހަަމަލާއާއި ގުޅިގެން ރައްޔިތުންގެ މަޖިލީހުން ކުރިއަށް ގެންދާ އިންކުއަރީއަށް އެމަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު ހާޒިރުކޮށް ސުވާލުކޮށްފި އެވެ.
ސަލާމަތީ ބާރުތަކުގެ ސެކިއުރިޓީ ބްރީޗުވި މައްސަލައާއި ގުޅިގެން މަޖިލީހުން ކުރިއަށް ގެންދާ އިންކުއަރީއަށް އިލިޔާސް ހާޒިރުކޮށްފަައި މިވަނީ އެހަމަލާއާއި ގުޅޭ މައުލުމާތެއް އޭނާއަށް ލިބިވަޑައިގެން ޑިފެންސް މިނިސްޓަރު މާރިޔާ އަހުމަދު ދީދީއާއި ހިއްސާ ކުރެއްވިކަމަށް ވިދާޅުވެފައިވާތީ އެވެ.
މިއަދު ހެނދުނު 10:00 ގައި އިލިޔާސް އިންކުއަރީއަށް ހާޒިރު ކުރިކަން އޭނާ ވަނީ ކަށަވަރުކޮށްދެއްވައިފަ އެވެ.
އިންކުއަރީގެ މަސައްކަތް ކުރިއަށް ގެންދަނީ ރައްޔިތުންގެ މަޖިލީހުގެ ސަލާމަތީ ކަންކަމާއި ބެހޭ ކޮމިޓީ، 241 ކޮމިޓީންނެވެ. އިލިޔާސް އަކީ ކުރިން އެކޮމިޓީގައި ހިމެނިވަޑައިގަންނަވާ މެމްބަރެކެވެ. އެހެންނަމަވެސް ނަޝީދަށް ދިން ހަމަލާއާއި ގުޅުންހުރި ކަންކަމެއް ފާހަގަކުރެވި އިލިޔާސް ވަނީ އެ ކޮމިޓީން ފެއަށް ޖެހިވަޑައިގެންފަ އެވެ. އިލިޔާސްގެ ބަދަލުގައި ކޮމިޓީގެ މަސައްކަތަށް އިސްވީ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ އެވެ.
މެމްބަރު އިލިޔާސް ލަބީބު މަޖިލިސް އިންކުއަރީގައި
އިލިޔާސް މީގެ ކުރިން ވިދާޅުވެފައިވަނީ ނަޝީދަށް ހަމަލާ ދޭން އުޅޭ މައުލޫމާތު ލިބުމާއި ގުޅިގެން މިނިސްޓަރު މާރިޔާއާއި ހިއްސާ ކުރެއްވި ކަމަށެވެ. އެކަމަށް މާރިޔާ އެއްވެސް އެކްޝަންއެއް ނަންގަވާފައި ނުވާއިރު އޭނާ ވިދާޅުވާ ގޮތުގައި ފުލުހުންނަށް މައްސަލަ ރިޕޯޓު ކުރުމަށް އިިޔާސްއަށް އިރުޝާދު ދެއްވި އެވެ. މާރިޔާގެ އެ ވާހަކަތައް އިލިޔާސް ދޮގުކުރައްވަ އެވެ.
ސަލާމަތީ ބާރުތަކުގެ ސެކިއުރިޓީ ފޫއަޅުވާލައި ރައީސް ނަޝީދަށް ޓެރަރިސްޓު ހަމަލާއެއް ދިނުމާއި ގުޅިގެން ރާއްޖޭގެ ސަލާމަތާއި ރައްކާތެރިކަމާއިމެދު ވަނީ ސުވާލު އުފެދިފަ އެވެ. މިއީ ނެޝަނަލް ސެކިއުރިޓީ ލެވެލް އެންމެ މަތިން ދީފައިވާ ބޭފުޅަކަށް އަމާޒުކޮށް މިފަދަ ހަމަލާއެއް ދީ އެހަމަލާ ކާމިޔާބު ކުރި ފުރަތަމަ ފަހަރެވެ.
