ކޮވިޑް-19 ގެ ސަބަބުން އައްޑޫ ސިޓީގައި އަޅާފައިވާ ރައްކާތެރިކަމުގެ ފިޔަވަޅުތަކަށް ލުއި ދީފި އެވެ.
މިދިޔަ މަހުގެ އެއްވަނަ ދުވަހުން ފެށިގެން އައްޑޫ ސިޓީ އޮތީ މޮނިޓަރިން ހާލަތުގަ އެވެ. މިހާރު އެސިޓީގެ ހިތަދޫ ފިޔަވައި އެހެން ތަނަކުން ޕޮޒިޓިވް ކޭސްއެއް ނުފެނެ އެވެ. ހިތަދޫއިން ފެންނަނީވެސް މަދު ކޭސް އެކެވެ. އެގޮތުން އިއްޔެ ހިތަދޫއިން އަލަށް ޕޮޒިޓިވް ވީ އެންމެ މީހެކެވެ.
މިދިޔަ ބުރާސްފަތި ދުވަހުން ފެށިގެން އައްޑޫ ސިޓީގައި ލުއިތަކެއް ދޭން ފެށިއިރު ހިތަދޫ ފިޔަވައި މަރަދޫ، މަރަދޫފެދޫ އަދި ފޭދޫގައި ވަނީ މަގުމައްޗަށް ނިކުތުމުގެ ހުއްދަ ދީފަ އެވެ. އަދި އެތަންތަނުގައި އެއްގަމު އުޅަނދު ދުއްވުން މަނާކޮށްފައި އޮތް އޮތުންވެސް ވަނީ ބާތިލުކޮށްފަ އެވެ.
މީގެ އިތުރުން ހިތަދޫ ފިޔަވައި އެހެން ތަންތަނުގައި ޖަމާއަތް ނުހަދައި މިސްކިތުގައި ނަމާދުވެސް ކުރެވޭނެ އެވެ. އަދި ޖިމްތަކާއި ސެލޫންތައް ހެނދުނު 8:00 އިން ހަވީރު 4:00 އަށް ހުޅުވައިގެން ހިދުމަތް ދިނުމުގެ ހުއްދަ މިހާރު ވަނީ ދީފަ އެވެ. ރެސްޓޯރެންޓު ކެފޭތަަކަށް ދިނީ ޑެލިވަރީއާއި ޓޭކްއަވޭގެ ހިދުމަތް ދިނުމަށް އިތުރު ވަގުތެވެ. އެގޮތުން ހެނދުނު 8:00 އިން ރޭގަނޑު 10:00 އަށް އެތަންތަނުން ހިދުމަތް ދެވޭނެ އެވެ.
މި ލުއިތަކާއިއެކުވެސް ބައެއް ކަންކަން އަދިވެސް ވަނީ މަނާކޮށްފަ އެވެ. އެގޮތުން އައްޑޫގައި ޕާޓީ އާއި އެކި ހަފްލާތައް ބޭއްވުމުގެ އިތުރުން ތިން މީހުންނަށްވުރެއް ގިނައިން މަގުމަތީގައި އުޅުންވެސް ވަނީ މަނާކޮށްފަ އެވެ. މީގެ އިތުރުން ޔުނިވަސިޓީތަކާއި ކޮލެޖުތަކަށް ހާޒިރުވެ ކްލާސްތައް ނެގުންވެސް މަނާވާނެ އެވެ.
ހިތަދޫގައިވެސް ކޮންމެވެސް ވަރެއްގެ ލުއިތަކެއް ވަނީ ދީފަ އެވެ. އެގޮތުން ޕޮލިސް ޕާމިޓާއި ނުލައި ކާފިއު ނޫން ވަގުތުތަކުގައި ޒަރޫރީ ބޭނުންތަކަށް ނިކުމެ އުޅުމުގެ ހުއްދަ ވަނީ ދީފަ އެވެ. ކާފިއު ވަގުތަކީ ހަވީރު 4:00 އިން ފަތިހު 4:00 އެވެ.
