ޓޫރިޒަމް މިނިސްޓަރު އިބްރާހީމް ފައިސަލް އެ މަގާމުން މިއަދު ވަކިކޮށްފި އެވެ.
އޭނަ އެ މަގާމުިން ވަކިކޮށްފައި މި ވަނީ ރާއްޖެ އިން ބޭރަށް ރަސްމީ ދަތުރުތައް ވެސް ކުރެއްވުން ހުއްޓަވާލައްވަން މިދިޔަ ހަފުތާގެ ތެރޭގައި ރައީސް އޮފީހުން އަންގާފައި ވަނިކޮށެވެ. ފައިސަލް މިނިސްޓަރު ކަމަށް އައްޔަންކުރީ ރައީސް ޑރ. މުހައްމަދު މުއިއްޒު ރައީސްކަމުގެ ހުވާކުރެއްވި ދުވަސް ކަމަށްވާ ނޮވެމްބަރު 17، 2023 ގަ އެވެ.
ފައިސަލް މިނިސްޓަރުކަމުން ވަކިކުރެއްވުމަށް ފަހު، އެ މިނިސްޓްރީ ވަގުތީ ގޮތުން ހިންގެވުން މިހާރު ވަނީ އިކޮނޮމިކް މިނިސްޓަރު މުހައްމަދު ސައީދާ ހަވާލުކޮށްފަ އެވެ.
ފައިސަލަކީ ރައީސް މުއިއްޒުގެ އެންމެ އަރިސް ބޭފުޅުންގެ ތެރޭގައި ހިމެނިވަޑައިގަންނަވާ ރައްޔިތުންގެ މަޖިލީހުގެ މިހާރުގެ ރައީސް އަބްދުއްރަހީމް އަބްދުﷲ ގެ ދަރިކަލެކެވެ.
ފައިސަލް މަގާމުން ވަކިކުރެއްވިއިރު، ރައީސާއި އަބްދުއްރަހީމްގެ ގުޅުން ވަރަށް ބޮޑަށް ގޯސްވެފައިވާކަމުގެ އަޑުތަކެއް ވެސް އަރާފައިވެ އެވެ.
