އިދިކޮޅު އެމްޑީޕީން "ފުދިއްޖެ، ފުނޑިއްޖެ"ގެ ނަމުގައި މިރޭ ބޭއްވި ހިނގާލުން ނިންމާލައިފި އެވެ.
މާލޭގެ އާޓިފިޝަލް ބީޗް ސަރަހައްދުން މިރޭ 8:30 ހާއިރު ފެށި ހިނގާލުން ކުރިއަށް ގެންދިޔައީ ބޮޑުތަކުރުފާނު މަގާއި އަމީނީ މަގުގައެވެ. މިއީ މި ވެރިކަމުގައި އެމްޑީޕީން ބޭއްވި ފުރަތަމަ މުޒާހަރާ އެވެ.
ވަރަށް ގިނަ އަދަދެއްގެ ބަޔަކު ބައިވެރިވި ހިނގާލުން ފަށައިގެން ނިންމާލުމާ ހަމައަށްވެސް އެއްވެސް ހަމަނުޖެހުމެއް ހިނގާފައެއް ނުވެ އެވެ.ހިނގާލުމަށް ފުލުހުން ވެސް ހުރަސްއަޅާފައެއް ނުވެ އެވެ.
މި ހިނގާލުމުގައި އެމްޑީޕީގެ ސަޕޯޓަރުންނާއި އެ ޕާޓީގެ އިސްވެރިން ބައިވެރިވެ ވަނީ ގިނަ ކަންބޮޑުވުންތަކެއް ފާޅުކޮށްފައެވެ. ހިނގާލުމުގެ ބައިވެރިން ވަނީ ގައުމީ ދިދައާއި އެމްޑީޕީގެ ދިދަ އުފުލައި، ސަރުކާރާ ދެކޮޅު ޝުއޫރުތައް ލިޔެފައިވާ ބެނާތައް ހިފައިގެން ހިނގާލުމުގައި ބައިވެރިވެފައެވެ.
މި ހިނގާލުމުގައި އެމްޑީޕީގެ ޗެއާޕާސަން ފައްޔާޒް އިސްމާއީލް، ޕާޓީގެ ރައީސް އަބްދުﷲ ޝާހިދު އަދި މާލެ ސިޓީގެ މޭޔަރު އާދަމް އާޒިމް ވަނީ އިސްކޮށް ހަރަކާތްތެރިވެފައެވެ. މީގެ އިތުރުން ޕާޓީގެ އެހެން އިސްވެރިންނާއި، މަޖިލީސް މެންބަރުންނާއި ގިނަ އަދަދެއްގެ އާންމު ރައްޔިތުން ވެސް ވަނީ ބައިވެރިވެފައެވެ.
