ރޭ ހުޅުމާލެއިން ޓެކްސީއެއް ބަލައި ފާސްކޮށް ބަނގުރާ ދަޅު ތަކަކާއެކު ތިން މީހަކު ހައްޔަރުކޮށްފި އެވެ.
ފުލުހުން ބުނީ އެ ޓެކްސީ ބަލައި ފާސްކުރީ މަސްތުވާތަކެއްޗާއި ދެކޮޅަށް ފުލުހުން ހިންގާ އޮޕަރޭޝަނެއްގެ ތެރެއިން ކަަމަށެވެ. އަދި އެ އޮޕަރޭޝަން ހިންގީ ހުޅުމާލެ ޕެޓްރޯލް ޖެޓީއާ ދިމާ ފަޅުތެރޭގައި އޮތް ޑިންގީއަކުން ޓެކްސީއަކަށް ބަނގުރާ އަރުވާ ކަމަށް ބުނެ ލިބުނު މައުލޫމާތަކާއި ގުޅިގެންކަމަށް ފުލުހުން ބުންޏެވެ.
މި އޮޕަރޭޝަނުގައި ފުލުހުންގެ ބެލުމުގެ ދަށަށް ގެންދިޔައީ އުމުރުން 24 އަހަރުގެ މީހަކާއި، 26 މީހެއްގެ އިތުރަށް 30 އަހަރުގެ މީހެކެވެ. ހައްޔަރުކޮށްފައިވާ އެންމެންނަކީވެސް ދިވެހި ފިރިހެނުން ކަމަށް ފުލުހުން ބުންޏެވެ.
އެ އޮޕަރޭޝަނުގައި ޓެކްސީ ބަލައިފާސްކުރުމުން ޓެކްސީ ތެރެއިން 48 ބަނގުރާ ދަޅު ފެނުނު ކަމަށްވެސް ފުލުހުން މައުލޫމާތު ދިނެވެ. މި މައްސަލަ ތަހުގީގުކުރަމުންދަނީ ހުޅުމާލެ ޕޮލިސް ސްޓޭޝަނުންނެވެ.
މީގެ ކުރިންވެސް ހުޅުމާލެއިން މިފަދަ މައްސަލަތައް ފެންމަތި ވިއެވެ. ހުޅުމާލެއަށް ބަނގުރާ އަރުވާކަމަށް ބެލެވެނީ އެސަރަހައްދުގައި އޮންނަ ސަފާރީތަކުންނެވެ.
