ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ބޮމުގެ ހަމަލާގައި އަނިޔާތަކެއް ލިބުނު އެމަނިކުފާނުގެ ބޮޑީގާޑު އެމްއެންޑީއެފްގެ ސާޖަންޓް އަހްމަދު އިލްހާމް އޮޕަރޭޝަނެއް ކުރަން ޖެހިއްޖެ އެވެ.
ރައީސް ނަޝީދުގެ ކޮއްކޯފުޅު ނާޒިމް އަބްދުއް ސައްތާރު ވަނީ އެމައުލޫމާތު ހިއްސާ ކުރައްވައިފަ އެވެ. އޭނާ ވިދާޅުވި ގޮތުގައި އިލްހާމް ކުރަނީ ކަނދުރާގެ އޮޕަރޭޝަނެކެވެ. އޮޕަރޭޝަން ކުރަން ހަމަޖެހިފައިވަނީ މާދަމާ އެވެ.
ބޮމުގެ ހަމަލާގައި ލިބުނު އަނިޔާތަކަށްފަހު އިލްހާމްގެ ކަނދުރާއަށް އުނދަގޫތަކެއް ވާތީ އުޅެ އެވެ. އޮޕަރޭޝަން ކުރަނީ އެ އުނދަގޫތަކާއި ގުޅިގެންނެވެ. މާދަމާ އޮޕަރޭޝަން ކުރަނީ އައިޖީއެމް ހޮސްޕިޓަލުގަ އެވެ.
ނަޝީދަށް ދިން ހަމަލާގައި ސަލާމަތީ ބާރުތަކުގެ ސެކިއުރިޓީ ބްރީޗުވި ގޮތް ބެލުމަށް ކުރިއަށް ގެންދާ މަޖިލިސް އިންކުއަރީއަށް އިލްހާމް ވަނީ ހާޒިރުކޮށްފަ އެވެ. އިލްހާމްގެ އިތުރުން ނަޝީދަށް ސެކިއުރިޓީ ދިން އިތުރު ދެ ބޮޑީގާޑުންވެސް އެ އިންކުއަރީއަށް ސުވާލު ކުރަން ވަނީ ހާޒިރު ކޮށްފަ އެވެ.
މިދިޔަ މެއި މަހުގެ 6 ވަނަ ދުވަހު ދިން ބޮމުގެ ހަމަލާގައި ނަޝީދުގެ އިތުރުން އަރިހުގައި ތިއްބެވި ތިން ބޮޑީގާޑުންނަށްވެސް އެކި ވަރުގެ އަނިޔާތައް ވަޏީ ލިބިފަ އެވެ. އެރޭ ނަޝީދު ފަރުވާއަށް ވެއްދުމަށްފަހު އޭޑީކޭ ހޮސްޕިޓަލުން ބޮޑީގާޑުންވެސް ވަނީ ފަރުވާ ހޯދައިފަ އެވެ. އެއް އޮފިސަރަކު ފަރުވާ ހޯދީ އައިޖީއެމްއެޗުންނެވެ.
