ކޮވިޑް-19 އާއި ގުޅިގެން ދައުލަތުން ކުރި ހޭދަ 3.4 ބިލިއަން ރުފިޔާއަށް އަރައިފި އެވެ.
ފިނޭންސް މިނިސްޓްރީން އިއްޔެއާއި ހަމައަށް ކުރި ހަރަދުތަކުގެ ތަފާސް ހިސާބުތައް ދައްކާ ގޮތުން ސިއްހީ އަދި އިޖުތިމާއީ ކަންކަމަށް ޚަރަދުކޮށްފައިވަނީ 1،789.6 މިލިއަން (1.7 ބިލިއަން) ރުފިޔާ އެވެ. މީގެ އިތުރުން އިގްތިސޯދީ ދަތިކަމުން އަރައިގަތުމަށް 1،743.4 މިލިއަން (1.4 ބިލިއަން) ރުފިޔާ ޚަރަދުކޮށްފައިވާކަމަށް ތަފާސް ހިސާބުތަކުން ދައްކަ އެވެ.
ޞިއްޙީ ކަންކަމަށް ޚަރަދުކުރި 1.7 ބިލިއން ރުފިޔާގެ ތެރެއިން އެންމެ ބޮޑު މިންވަރެއް ޚަރަދުކޮށްފައިވަނީ ނޭޝަނަލް ޑިސާސްޓާ މެނޭޖުމެންޓު އޮތޯރިޓީ (އެންޑީއެމްއޭ) އާއި ހެލްތު މިނިސްޓްރީންނެވެ. އެންޑީއެމްއޭއިން މި މުއްދަތުގައި 783.8 މިލިއަން ރުފިޔާ ހަރަދުކުރި އިރު މިނިސްޓްރީން ހަރަދު ކުރީ 559.9 މިލިއަން ރުފިޔާ އެވެ.
އިގްތިސޯދީ ކަންކަމަށް ހަރަދުކުރި ފައިސާގެ ތެރެއިން ގޭބީސީތަކަށް ބަލާއިރު، ފެން ބިލުތަކަށް ސަބްސިޑީ ދިނުމަށް މިހާތަނަށް 26 މިލިއަން ރުފިޔާ އަދި ކަރަންޓު ބިލުތަކަށް ސަބްސިޑީ ދިނުމަށް 146.7 މިލިއަން ރުފިޔާ ޚަރަދުކޮށްފައި ވެއެވެ.
އިންކަމް ސަޕޯޓުގެ ގޮތުގައި ސަރުކާރުން ވަނީ 421 މިލިއަން ރުފިޔާ ދޫކޮށްފަ އެވެ. އެއީ 22،945 މީހުންނަށް ސަޕޯޓު ދިނުމަށެވެ. މީގެ އިތުރުން އެސްޑީއެފްސީ މެދުވެރިކޮށް ކުދި ވިޔަފާރިތަކަށް 362.3 މިލިއަން ރުފިޔާގެ ލޯނު ދޫކޮށްފައިވާއިރު، ބޭންކް އޮފް މޯލްޑިވްސް މެދުވެރިކޮށް ބޮޑެތި ވިޔަފާރިތަކަށް 585.9 މިލިއަން ރުފިޔާ އަދި 8.0 މިލިއަން ޑޮލަރު ލޯނުގެ ގޮތުގައި ދޫކޮށްފައިވާ ކަމަށް ތަފާސް ހިސާބުތަކުން ދައްކަ އެވެ.
