އަންނަ ޖުލައި މަހުގެ ތެރޭގައި ރާއްޖެއަށް މިވަގުތަށް އެކަށީގެންވާ ވަރަށް ވެކްސިން ލިބޭނެ ކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެ އެވެ.
މިއަދު ކުރިއަށް ދިޔަ ނޫސްވެރިންގެ ބައްދަލުވުމެއްގައި މިނިސްޓަރު ނަސީމް ވިދާޅުވީ ވެކްސިން ލިބޭނެ ކަމަށް ބެލެވެނީ ޖުލައި 12 ވަަނަ ދުވަހާއި 20 ވަަނަ ދުވަހާއި ދެމެދު ކަމަށެވެ. އެހެންނަމަވެސް ސީދާ ތާރީހެއް ދަންނަވަން އުނދަގޫކަމަށް ވިދާޅުވި އެވެެ.
މައުލޫމާތުތައް ދައްކަނީ ޖުލައި މަހުގެ 12 ވަނަ ދުވަހާ 20 ވަނަ ދުވަހާ ދޭތެރޭ ވެކްސިން ލިބޭނެ ކަމަށް. ލިބޭނީ އެސްޓްރަޒެނެކާ ވެކްސިން
- ހެލްތު މިނިސްޓަރު އަހުމަދު ނަސީމް
އެސްޓްރެޒެނިކާ ވެކްސިންގެ 700،000 ޑޯޒް ގަންނަން ސިންގަޕޫރުގެ އެސްޓްރާޒެނެކާ ސިންގަޕޯ ޕީޓީއީ އެލްޓީޑީ އަށް ފައިސާ ދެއްކީ މިދިޔަ އަހަރުގެ ޑިސެމްބަރު މަހު އެވެ. އެ ވެކްސިން ލިބޭނެކަމަށް ކުރިން ލަފާކުރެވިފައި އޮތީ މިމަހު އެވެ. ވެކްސިން ލިބޭނެކަމަށް ބުނެ ސަރުކާރުން އިތުރު ތާރީހެއް ދީފައިވާއިރު، މިއީ އެސްޓްރެޒެނިކާ ވެކްސިން ރާއްޖެއަށް ގެނަސް ޖަހަން ފަށާނެ ފުރަތަމަ ފަހަރެވެ.
މީގެ ކުރިން ރައީސް އިބްރާހިމް މުހައްމަދު ސޯލިހު ވިދާޅުވި ގޮތުގައި މިފެށޭ ޖުލައި މަހުގެ ތެރޭގައި 500،000 ޑޯޒްގެ އެސްޓްރެޒެނިކާ ވެކްސިން ލިބޭނެ އެވެ. މިނިސްޓަރު ނަސީމް ވިދާޅުވީ 700،000 ޑޯޒް ފޯރުކޮށްދޭނީ ތިން ފިޔަވައްސަކަށް ބަހާކާލައިގެން ކަމަށެވެ. އެހެންނަމަވެސް ފުރަތަމަ ފިހަވަހީގައި ވެކްސިން ފޯރުކޮށްދޭން ބުނި ތާރީހު މިހާރު ވަނީ ފަހަނައަޅާ ގޮސްފަ އެވެ.
މިއަދުގެ ނޫސްވެރިންގެ ބައްދަލުވުމުގައި ލިބޭނެ ވެކްސިންގެ އަދަދެއް ނަސީމް ވިދާޅެއް ނުވެ އެވެ. އަދި ލިބޭނީ ކިތައް ފިޔަވަހީގައި ފޯރުކޮށްދޭން ބުނި ވެކްސިންކަމެއްވެސް ތަފްސީލެއް ނުކޮށްދެ އެވެ.
އެސްޓްރެޒެނިކާ ވެކްސިންގެ އިތުރުން ހަމަ އެ ފޯމިއުލާއަށް އިންޑިއާއިން އުފައްދާ ކޮވިޝީލްޑް ވެކްސިންގެ 200،000 ޑޯޒް ވެސް އަދި ނުލިބެ އެވެ. ފައިސާ ދައްކާފައިވާ އެ ވެކްސިން ނުލިބުމުގެ ސަބަބުން ރާއްޖޭގަިއ ކޮވިޝީލްޑް ވެކްސިންގެ ފުރަތަމަ ޑޯޒް ޖެހި ލައްކައަކަށްވުރެއް ގިނަ މީހުންނަށް ތިބީ ދެވަނަ ޑޯޒް ނުލިބިފަ އެވެ.
ސަރުކާރުން ގަސްތު ކުރަނީ ކޮވިޝީލްޑް ވެކްސިންގެ ކުރިން އެސްޓްރެޒެނިކާ ވެކްސިން ލިބިއްޖެ ނަމަ ދެވަނަ ޑޯޒްގެ ގޮތުގައި އެ ވެކްސިން ދޭށެވެ. ދެ ވެކްސިންވެސް އުފެއްދީ އެއް ފޯމިއުލާއަކަށް ކަމުން ޓެކްނިކަލް އެޑްވައިޒަރީ ގްރޫޕު (ޓެގް) އިންވެސް ވަނީ އެގޮތަށް ލަފާ އަރުވައިފަ އެވެ.
