ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް މިދިޔަ މެއި މަހުގެ 6 ވަނަ ދުވަހު ދިން ހަމަލާއާއި ގުޅިގެން ހައްޔަރު ކުރި ހަތަރު މީހުންގެ ބަންދުގެ މުއްދަތު ކޯޓުން އިތުރުކޮށްފި އެވެ.
ބަންދުގެ މުއްދަތު އިތުރު ކުރީ ވ. ތިނަދޫ ލަކީ، އަދުހަމް އަހްމަދު 25، އާއި، މއ. ފޭރުގެ، މުޖާޒް އަހުމަދު 21، އާއި، ގއ. ކޮނޑޭ ފޮޅޭމާ، ތަހުމީން އަހްމަދު 32، ގެ އިތުރުން ލ. ގަން ދުންފިނިއުފާ، އަހްމަދު ފާތިހް 23 އެވެ. މިމީހުންގެ ބަންދުގެ މުއްދަތު 30 ދުވަހަށް އިތުރު ކުރީ މިމަހުގެ 22 ވަނަ ދުވަހު އެވެ. މިއީ މި ހަތަރު މީޙުންގެ ބަންދުގެ މުއްދަތު އިތުރު ކުރި 4 ވަނަ ފަހަރެވެ.
ހައްޔަރު ކުރި މީހުންގެ ތެރޭގައި ހިމެނޭ އަދުހަމް އަކީ ރިމޯޓަކުން ބޮން ގޮއްވައިލި މީހާ އެވެ. މީގެ އިތުރުން ތަހުމީނަކީ ބޮން ހަރުކޮށްފައި އިން ސައިކަލުގެ ވެރި ފަރާތެވެ.
އިއްޔެ އޮތް ނޫސްވެރިންގެ ބައްދަލުވުމެއްގައި ރައީސް ނަޝީދަށް ދިން ޓެރަރިސްޓު ހަމަލާއާއި ގުޅޭގޮތުން ރައީސް އިބްރާހިމް މުހައްމަދު ސޯލިހު ވިދާޅުވީ 8 މީހެއްގެ ތަހުގީގު ބާރަށް ކުރިއަށް ދާކަމަށެވެ. އަދި އޭގެ ތެރެއިން ހަތަރު މީހުންގެ ތަހުގީގު ނިންމައި ވަރަށް އަވަހަށް ޕްރޮސެކިއުޓާ ޖެނެރަލް އޮފީހަށް ފޮނުވާނެ ކަމަށްވެސް ފުލުހުންނާ ހަވާލާދީ ރައީސް ސޯލިހު ވިދާޅުވި އެވެ.
