ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާގައި ބައިވެރިވިކަމުގެ ތުހުމަތުގައި ހައްޔަރު ކުރި މީހުންގެ ތެރެއިން ފަސްވަނަ މީހެއްގެ ވަނަވަރު ފުލުހުން އާންމުކޮށްފި އެވެ.
ފުލުހުން ބުނީ މިމަހުގެ 11 ވަނަ ދުވަހު އެ ޓެރަރިސްޓު ހަަމަލާއާއި ގުޅިގެން ހައްޔަރު ކުރީ ނ. މަނަދޫ ނޫރީގެ، އުމުރުން 27 އަހަރުގެ އަލީ ހައިޝަމް ނަމަކަށް ކިޔާ މީހެއް ކަމަށެވެ. އޭނާގެ ބަންދުގެ މުއްދަތު މިމަހު 15 ދުވަހަށް އުތުރުކުރަން 27 ޖޫންގައި ނިންމާފައިވާކަމަށްވެސް ފުލުހުން ބުންޏެވެ.
މީގެ އިތުރުން ހައްޔަރު ކުރި އިތުރު ހަތަރު މީހެއްގެ ބަންދުގެ މުއްދަތުވެސް އިތުރުކޮށްފައިވާކަމަށް ފުލުހުން ބުންޏެވެ. ބަންދުގެ މުއްދަތު އިތުރު ކުރީ ވ. ތިނަދޫ ލަކީ، އަދުހަމް އަހްމަދު 25، އާއި، މއ. ފޭރުގެ، މުޖާޒް އަހުމަދު 21، އާއި، ގއ. ކޮނޑޭ ފޮޅޭމާ، ތަހުމީން އަހްމަދު 32، ގެ އިތުރުން ލ. ގަން ދުންފިނިއުފާ، އަހްމަދު ފާތިހް 23 އެވެ. މިމީހުންގެ ބަންދުގެ މުއްދަތު 30 ދުވަހަށް އިތުރު ކުރީ މިމަހުގެ 22 ވަނަ ދުވަހު އެވެ. މިއީ މި ހަތަރު މީޙުންގެ ބަންދުގެ މުއްދަތު އިތުރު ކުރި 4 ވަނަ ފަހަރެވެ.
ހައްޔަރުކުރި މީހުންގެ ތެރެއިން ފާތިހުގެ މުއްދަތު އިތުރު ކުީ މިމަހުގެ 20 ވަނަ ދުވަހު އެވެ. އެދުވަހު އަދުހަމްގެ ބަންދަށް އިތުރު ކުރީ 15 ދުވަހެވެ. އަދުހަމް އަކީ ރިމޯޓަކުން ބޮން ގޮއްވައިލި މީހާ އެވެ. މީގެ އިތުރުން ތަހުމީނަކީ ބޮން ހަރުކޮށްފައި އިން ސައިކަލުގެ ވެރި ފަރާތެވެ.
ވަނަވަރު އާންމުކުރި 5 މީހުންގެ އިތުރުން 3 މީހެއްގެ ތަހުގީގު ކުރިއަށް ދާކަމަށް އިއްޔެ ރައީސް އިބްރާހިމް މުހައްމަދު ސޯލިހު ވަނީ ވިދާޅުވެފަ އެވެ.
