ރައްޔިތުންގެ މަޖިލީހުގެ މީދޫ ދާއިރާގެ މެމްބަރު ރޮޒައިނާ އާދަމް ރާއްޖޭގެ މީޑިއާތަކަށާއި މީޑިއާތަކުގައި މަސައްކަތް ކުރާ ނޫސްވެރިންނަށް ވަރަށް ބޮޑަށް ފާޑުވިދާޅުވެއްޖެ އެވެ.
އިންޑިއާއާއި ދެކޮޅަށް ހަބަރުތައް ގެނަސްދޭ މީޑިއާތަކާއި ދެކޮޅަށް ފިޔަވަޅު އަޅައިދިނުމަށް ހައި ކޮމިޝަނުން އެދުމާއި ގުޅިގެން ރޮޒައިނާ ވަނީ އެމްއެމްސީގައި އެމައްސަލަތައް ބަލައިދިނުމަށް އެދިފަ އެވެ. މިކަމަށް ރޮޒައިނާ އެދުނީ ރައްޔިތުންގެ މަޖިލީހުގެ މިނިވަން މުއައްސަސާތަކާއިބެހޭ ކޮމިޓީގެ މުގައްރިރުކަމުގެ ހައިސިއްޔަތުންނެވެ. އެހެންނަމަވެސް އެކަމުގެ މަޝްވަރާއެއް ކޮމިޓީގައި ކޮށްފައިނުވާކަމަށް ވަނީ އެނގިފަ އެވެ.
މީޑިއާތަކަށް ވަރަށް ބޮޑަށް ފާޑު ވިދާޅުވަމުން ރޮޒައިނާ ވިދާޅުވީ މީޑިއާއަކީ ޑިމޮކްރަސީގެ ހަތަރުވަނަ ތަނބު ކަމުގައި ވާއިރު މީޑިއާއިން އަމަލު ކުރަން ވާނީ ވަރަށް ޒިންމާދާރު ކަމާއިއެކު ކަމަށެވެ. އަދި މީޑިއާތަކަކީ ދޮގު ހަބަރު ފަތުރާ ރައްޔިތުންނަށް ކަންކަން އޮޅުވައިލާ ނަފްރަތު އުފައްދަން މަސައްކަތް ކުރާ ބަޔަކަށް ވެގެން ނުވާނެ ކަމަށްވެސް އޭނާ ވިދާޅުވި އެވެ.
އަޅުގަނޑު މީޑިއާގެ މިނިވަންކަމަށް ފުރިހަމައަށް ތާއީދު ކުރަން. އަދި އެއްވެސް ތެދު ހަބަރެއް ޖެހުމުގައި ހުރަހެއް އޮވެގެން ނުވާނެ ކަމަށް ގަބޫލު ކުރަން. ނަމަވެސް ތޯތޯ ވާހަކަ އާ ބުނީ ބުނީ ވާހަކަ، ކަމުގެ ދެކޮޅު ނުބަލައި ޖެހުމަކަށް ތާއީދެއް ނުކުރަން. މިކަމުން މުޖުތަމައު ހަލާކުވޭ.
- މެމްބަރު ރޮޒައިނާ އާދަމް
ރޮޒައިނާ ވިދާޅުވީ ނޫސްވެރިންނަކީ އަހުލާގު ރަނގަޅު ޒިންމާދާރު ބަޔަކަށް ވުން ވަރަށް މުހިންމު ކަމަށެވެ. އަދި އެމީހުންނަކީ ބަސްމަގު ހުތުރު، މީހުންނަށް ބިރު ދައްކާ ބަޔަކަށް ވުމުން އެއީ ނޫސްވެރިން ކަމުގައި ބަލައި ނުގަނެވޭކަމަށާއި ބައެއް މީހުންނަކީ ނޫސްވެރިންގެ ނަމުގައި ތިބެ ޕާޓީގެ އެކްޓިވިސްޓުންގެ ރޯލު އަދާކުރާ މީހުންކަމަށް ރޮޒައިނާ ވިދާޅުވި އެވެ.
މިފަދަ ނޫސްވެރިންގެ ސަބަބުން މީޑިއާތަކަށް ހުތުރު ނަން ލިބި ރައްޔިތުންގެ އިތުބާރު ގެއްލޭކަމަށް އޭނާ ވިދާޅުވި އެވެ. އަދި މިއީ ވަރަށް ދެރަ މައްސަލައެއް ކަމަށާއި މިކަން ހައްލު ކުރުމަށް ހުރިހާ މީޑިއާތަކުގެ އިސް ވެރިންނާއި ބްރޯޑްކާސްޓިންގް ކޮމިޝަން އަދި މީޑިއާ ކައުންސިލުންވެސް ހަރުދަނާ މަސައްކަތްތަކެއް ކުރަންޖެހޭ ކަަމަށް ރޮޒައިނާ ވަނީ ވިދާޅުވެފަ އެވެ.
މީޑިއާއަށް ހުރަސް އަޅަން މިނިވަން މުއައްސަސާތަކގެ ކޮމިޓީން އެއްވެސް މަސައްކަތެއް ނުކުރާނެ.
- މެމްބަރު ރޮޒައިނާ އާދަމް
ރޮޒައިނާ ވިދާޅުވީ ހުރަސް ނޭޅި ނަމަވެސް މީޑިއާތަކަކީ ޒިންމާދާރު ކަމާއިއެކު ރައްޔިތުން އިތުބާރު ކުރާ ރަނގަޅު ބައެއްގެ ގޮތުގައި ބިނާކުރުމަށް މީޑިއާ ކައުންސިލަށް ދޭންޖެހޭ އެއްބާރުލުން މިނިވަން މުއައްސަސާތަކާއިބެހޭ ކޮމިޓީން ދޭނެ ކަމަށެވެ. އަދި އެކަން މީޑިއާ ކައުންސިލުން ކުރޭތޯވެސް ފާރަވެރިވާނެ ކަމަށް އޭނާ ވިދާޅުވި އެވެ.
ރޮޒައިނާ މިފަދައިން ވިދާޅުވެފައިމިވަނީ އިންޑިއާއާއި ރާއްޖެއާއި ދެމެދު އޮތް ގުޅުމުގެ ސަބަބުން ރާއްޖޭގެ މިނިވަންކަމަށް ހުރަސްއެޅޭކަމަށް ގިނަ މީޑިއާތަކަކުން ރިޕޯޓުކުރަމުންދާ ދަނޑިވަޅެއްގަ އެވެ. 2018 ވަނަ އަހަރުން ފެށިގެން އިންޑިއާއިން އެކި ގޮތްގޮތަށް ރާއްޖެއަށް ނުފޫޒު ފޯރުވަމުންދާ ކަމުގެ ތުހުމަތު އިދިކޮޅުންވެސް ދަނީ ކުރަމުންނެވެ. އަދި ސޯޝަލް މީޑިއާގައި ލީކުވި ބައެއް އެގްރީމެންޓުތަކުން ވަނީ އިންޑިއާއިން ރާއްޖޭގައި ސިފައިން ބައިތިއްބަން އުޅޭކަންވެސް ދޭހަވެފަ އެވެ. މީގެ އިތުރުން ރާއްޖޭގެ ބައެއް މީޑިއާތަކަށް އިންޑިއާ ހައި ކޮމިޝަނުން ފައިސާ ދޭކަމަށްވެސް ވަނީ އަޑު ފެތުރިފަ އެވެ. ބައެއް ނޫސްވެރިންނާއި ވަކި ވަކިންވެސް އިންޑިއާ ހައިކޮމިޝަނުން މީގެ ކުރިން ވަނީ ބައްދަލުކޮށްފަ އެވެ.
ރޮޒައިނާއަކީ ކުރީގެ ރައީސް އަބްދުﷲ ޔާމީންގެ ސަރުކާރުން މީޑިއާތަކަށް ފިޔަވަޅު އެޅުމުން އިދިކޮޅުގައި ހުންނަވައި ސަރުކާރަށް އެންމެ ބޮޑަށް ފާޑުވިދާޅުވި އެއް ބޭފުޅާ އެވެ. އެމްޑީޕީގެ މަސްލަހަތު އޮންނަ "ރާއްޖެ ޓީވީ" އަށް ބްރޯޑްކޮމްއިން އެކި ފަހަރުމަތިން ފިޔަވަޅު އެޅީ ސަރުކާރުގެ ބައެއް އިސް ބޭފުޅުންނާއި ގުޅުވައި ސާބިތު ނުހިފޭ ވާހަކަދައްކައި ނަފުރަތު އުފައްދާކަމުގެ ތުހުމަތުގަ އެވެ.
މިއަދު އަނެއްކާވެސް އިދިކޮޅުގެ މަސްލަހަތު އޮންނަ ބައެއް މީޑިއާތަކާއި ދެކޮޅަށް ފިޔަވަޅު އެޅުމުގެ ވާހަކަތަކެއް ދެކެވޭއިރު އެމްޑީޕީގެ ބައެއް ބޭފުޅުން ވަނީ ފުލުހުންވެސް މީޑިއާތަކުގެ މައްސަލަ ތަހުގީގު ކުރަމުން ދާކަމަށެވެ. އެމްޑީޕީގެ މަސްލަހަތު އޮންނަ ބައެއް މީޑިއާތަކުން މިހާރުވެސް ގެންދަނީ ރައީސް ޔާމީނާއި އިދިކޮޅުގެ ބައެއް ހަރަކާތްތަކާއި ގުޅުވައި ނަފްރަތު އުފެދޭފަދަ ބައެއް ވާހަކަތައް ފަތުރަމުންނެވެ. އެވާހަކަތައް އިދިކޮޅުން ރަސްމީކޮށް ދޮގުކޮށް ކުށްވެރިކުރިނަމަވެސް އެ މީޑިއާތައް ސަރުކާރުންވެސް އަދި މަޖިލީހުންވެސް ކުށްވެރިކޮށްފައެއް ނުވެ އެވެ.
