މަސްވެރިކަމަށް ނިކުމެ އުޅުނު އައްޑޫ ދޯންޏެއް މެދުން ބިންދައިގެން ހިނގައްޖެ އެވެ.
މި ހާދިސާގައި ބިންދައިގެން ދިޔައީ ހިތަދޫ "މޯހިރި" ނަމަކަށް ކިޔާ ދޯންޏެކެވެ. ދޯނި ބިންދައިގެން ދިޔައީ ދުއްވަމުން ދަނިކޮށް ކުއްލިއަކަށެވެ. އޭރު އޭގައި 25 ފަޅުވެރިއަކު ތިބިކަމަށް ވެއެވެ. މިއެއްވެސް މީހަކަށް ގެއްލުމެއް ނުލިބެ އެވެ.
މެދުން ބިންދައިގެން ގޮސްފައިވާ މޯހިރި ދޯނި
އެމްއެންޑީއެފްއިން ބުނީ ދޯނި ބިންދައިގެން ދިޔައީ މޫސުން ގޯސްވެގެން ކަމަށެވެ. މި ހާދިސާގެ ރިޕޯޓު އެމްއެންޑީއެފް އަށް ލިބުނީ މިއަދު ހެނދުނު 7.11 ގަ އެވެ. އޭރު ދޯނި ދަތުރު ކުރަމުން ދިޔައީ ގއ. ދެއްވަދޫގެ އުތުރުން 8.9 ނޯޓިކަލް މޭލު ބޭރުންނެވެ.
ރިޕޯޓު ލިބުނުތާ މާ ގިނައިރެއް ނުވެ ސަދަން އޭރިއާގެ ކޯސްޓު ގާޑުން ވަނީ އެސަރަހައްދަށް ގޮސް ދޯނީގައި ތިބި ފަޅުވެރިންނަށް އެހީތެރިކަން ފޯރުކޮށްދީފަ އެވެ.
ދޯނި ބިންދައިގެން ގޮސް ގެގަނޑާއި ދޯނީގެ ފަހަތުކޮޅު ދެބައިވެފައިވާއިރު އެސަރަހައްދަށް ދެ ދޯންޏެއް ގޮސް ދޯނީގެ ބައިތައް ކަފު ޖަހައިގެން ގެންދަން ދަނީ މަސައްކަތް ކުރަމުންނެވެ.
