އިއްޔެ ރާއްޖެއަށް ގެނައި ކޮވިޝީލްޑް ވެކްސިންގެ އާ ޝިޕްމެންޓަކީ ދިވެހި ސަރުކާރުން، އިންޑިއާގެ ސިރަމް އިންސްޓިއުޓުން ގަތް ވެކްސިން ނޫން ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފި އެވެ.
އިންޑިއާގެ ސިރަމް އިންސްޓިޓިއުޓާއެކު އެއްބަސްވުމެއް ގާއިމްކޮށް 300،000 ކޮވިޝީލްޑް ޑޯޒް ގަންނަން ސަރުކާރުން ފައިސާ ދެއްކި އެވެ. އޭގެ ތެރެއިން މިހާތަނަށް ލިބުނީ 100،000 ޑޯޒް އެވެ. އިއްޔެ ކޮވިޝީލްޑް ވެކްސިންގެ އިތުރު ޑޯޒްތަކެއް ރާއްޖެއަށް ލިބުނުއިރު އެއީ ސިރަމް އިންސްޓިޓިއުޓުން ގަތް ވެކްސިން ނޫންކަމަށް އެޗްޕީއޭއިން ބުނެ އެވެ.
"ހަމައެމްވީ" އިން ސުވާލު ދެންނެވުމުން އެޗްޕީއޭގެ މީޑިއާ އޮފިޝަލް ވިދާޅުވީ އިއްޔެ ލިބުނީ ހެޔޮ އެދޭ ފަރާތަކުން ރާއްޖެއަށް ހަދިޔާ ކުރި ވެކްސިނެވެ. ހަދިޔާ ކުރީ ކިހާ އަދަދެއްގެ ވެކްސިނެއްކަން ހާމައެއް ނުކުރެ އެވެ. އެހެންނަމަވެސް މެދު ނުކެނޑި ވެކްސިން ދެވޭ ވަރަށް ރާއްޖޭގައި މިހާރު ކޮވިޝީލްޑް އެބަ ހުރި ކަމަށް އެޗްޕީއޭއިން ބުންޏެވެ.
މިއަދުން ފެށިގެން ކޮވިޝީލްޑް ވެކްސިން ރާއްޖޭގައި ދެމުން ގެންދާނެ އެވެ. އެހެންނަމަވެސް އެ ވެކްސިން ދޭނީ ހަަމައެކަނި ކުރިން ފުރަތަމަ ޑޯޒް ޖަހާފައިވާ ފަރާތްތަކުގެ ތެރެއިން ދެވަނަ ޑޯޒް ނުޖަހައި ތިބި މީހުންނަށެވެ. ވެކްސިން ދޭނީ އެޕޮއިންޓްމެންޓު ހައްދައިގެންނެވެ. އަދި ކުރިން ވެކްސިންގެ ފުރަތަމަ ޑޯޒް ޖެހި މީހުންނަށް ދެވަނަ ޑޯޒް ދޭނީ ތަރުތީބުން ކަމަށްވެސް އެޗްޕީއޭއިން ބުންޏެވެ.
ކޮވިޝީލްޑް ވެކްސިން ރާއްޖެއިން ހުސްވިއިރު އެ ވެކްސިންގެ ފުރަތަމަ ޑޯޒް ޖަހައި ދެވަަނަ ޑޯޒް ނުޖެހިފައިތިބި ލައްކައަކަށްވުރެއް ގިނަ މީހުން އެބަ ތިއްބެވެ.
