އިންފޮމޭޝަން ކޮމިޝަނަރުގެ މަގާމަށް ކުރިމަތިލާން ހުޅުވައިލި މުއްދަތުގައި އެކަށީގެންވާ ތަރުހީބެއް އެކަމަށް ނުލިބުމުގެ ސަބަބުން އެމަގާމަށް ކުރިމަތިލާން އަނެއްކާވެސް ހުޅުވާލައިފި އެވެ.
ރައީސް އޮފީހުން މިއަދު ކުރި އިއުލާނެއްގައި ބުނީ މި މަގާމަށް އެދޭ ފޯމު ބަލައިގަންނަން ހަމަޖެހިފައިވަނީ މިމަހުގެ 12 އަދި 13 ވަަނ ދުވަހު ހެނދުނު 10:30 އިން މެންދުރު 12:30 އަށް އެ އޮފީހުން ކަމަށެވެ.
އިންފޮމޭޝަން ކޮމިޝަނަރުގެ މަގާމަށް ކުރިމަތިލާން ހުޅުވައިލި މިއީ ތިންވަނަ ފަހަރެވެ.
އިންފޮމޭޝަން ކޮމިޝަނަރުގެ މަގާމު ހުސްވީ އެ މަގާމުގައި ހުންނެވި ހުސައިން ފިޔާޒު މޫސާ އިސްތިއުފާ ދެއްވުމުންނެވެ އޭނަ އިސްތިއުފާ ދެއްވީ އަމިއްލަ ނޫހެއް އުފެއްދެވުމަށެވެ.
އެ މަގާމަށް މީހަކު އައްޔަނު ކުރުމަށް މީގެ ކުރިން ރައީސް އިބްރާހިމް މުހައްމަދު ސޯލިހު ތިން ނަމެއް މަޖިލީހަށް ފޮނުއްވި އެވެ. އެ ތިން ބޭފުޅުންގެ ނަންވެސް ކޮމިޓީން ފާހެއް ނުވި އެވެ.
އިންފޮމޭޝަން ކޮމިޝަނަރުގެ މަގާމަށް އައްޔަން ކުރެއްވުމަށްޓަކައި ރުހުން ހޯދަން ރައީސް ސޯލިހް ފޮނުއްވީ ޝިހާމް މުހައްމަދު ވަހީދު، އާހިދު ރަޝީދު އަދި މަރިޔަމް އަލީމްގެ ނަމެވެ. މިއިން އެއްވެސް ބޭފުޅަކަށް ރުހުން ނުދޭން ކޮމެޓީން ނިންމި އެވެ.
އިންފޮމޭޝަން ކޮމިޝަނަރުގެ މަގާމު ހުސްވެފައި އޮތްއިރު ގާނޫނުގައި ބުނާ ތާރީހުވެސް މިހާރު ވަނީ ފަހަނަ އަޅާ ގޮސްފަ އެވެ. ގާނޫނު ބުނާ ގޮތުން މަގާމު ހުސްވާތާ 60 ދުވަހުގެ ތެރޭގައި ބޭފުޅަކު އެ މަގާމަށް އައްޔަނުކުރަން ޖެހެ އެވެ. ފިޔާޒު އިސްތިއުފާ ދެއްވިތާ މިއަދަށް ވަނީ 100 ދުވަސް ވެފަ އެވެ.
