ކޮވިޑް-19 ގެ ސަބަބުން އޮންލައިންކޮށް ކުރިއަށް ގެންދިއުމަށްފަހު ރައްޔިތުންގެ މަޖިލީހުގެ ޖަލްސާތައް ތަޅުމުގައި އަނެއްކާވެސް ފަށައިފި އެވެ.
މަޖިލިސް ޖަލްސާތައް އޮންލައިންކޮށް ބާއްވަން ފެށީ މާލެ ސަރަހައްދުގައި ކޮވިޑުގެ ހާލަތު ގޯސްވެ ގިނަ ވަގުތުތަކެއްގައި ކާފިއު އިއުލާން ކުރުމާއި ގުޅިގެން މިދިޔަ މެއި މަހުގެ 24 ވަނަ ދުވަހު އެވެ. އެދުވަހުގެ ފަހުން ކޮމިޓީތައްވެސް ބާއްވަމުން ދިޔައީ އޮންލައިންކޮށެވެ.
އެހެންނަމަވެސް މަޖިލިސް ރައީސް މުހައްމަދު ނަޝީދަށް ދިން ޓެރަރިސްޓު ހަމަލާއާއި ގުޅިގެން ސަލާމަތީ ބާރުތަކުގެ ސެކިއުރިޓީ ބްރީޗުވި މައްސަލައިގެ މަޖިލިސް އިންކުއަރީ 241 ކޮމިޓީން ކުރިއަށް ގެންދިޔައީ މަޖިލިސް އިދާރާގަ އެވެ.
ތަޅުމުގައި އަލުން ޖަލްސާތައް މި ފެށީ ކޮވިޑު ނަމްބަރުތައް މާލެ ސަރަހައްދުގައި ވަރަށް ބޮޑަށް ދަށަށް ގޮސް ލުއި ދިނުމާއި ގުޅިގެންނެވެ. ލުއި ދިނީ މިމަހުގެ އެއް ވަނަ ދުވަހު އެވެ.
