ރޭޕް ކުރުމާއި ޖިންސީ ގޯނާ ކުރުމުގެ މައްސަލަތައް އިތުރުވަމުން ދާތީ އެފަދަ މައްސަލަތަކާއި ގުޅިގެން އިދިކޮޅު ކޯލިޝަނުން މަޖިލީހަށް ގަރާރެއް ހުށަހަޅައިފި އެވެ.
ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް އުމަރު މިއަދު ހުށަހެޅުއްވި މި ގަރާރުގައި ވަނީ ރޭޕް ކުރުމާއި ޖިންސީ ގޯނާ ކުރުމުގެ މައްސަލަތައް ކަންބޮޑުވާ މިންވަރަކަށް އިތުރު ވަމުން ދިޔުމާއި، އަންހެނުންގެ އަބުރާއި، ކަރާމާތައް އަރައިގަންނަމުން ދާއިރު މިފަދަ މައްސަލަތަކުގައި ފިޔަވަޅު ނޭޅި އިންސާފު ލިބުން ލަސްވާތީ އެކަން ފާހަގަކޮށްފަ އެވެ.
ރޭޕްގެ ބައެއް މައްސަލަތައް ވަކި ހިސާބަކުން އޮއްބައިލާތީ އެކަން ގަރާރުގައި ވަނީ ފާހަގަކޮށްފަ އެވެ. އެގޮތުން ގަރާރުގައި ބުނީ ފިޔަވަޅު އެޅުން ލަސްވުމުގެ ސަބަބުން ޖިންސީ ގޯނާގެ މައްސަލަތައް އިތުރުވާކަން ފާހަގަކުރެވޭ ކަމަށާއި އެއާއެކު މުޖުތަމައުގައި ބިރުވެރިކަމާއި ނާމާންކަން އުފެދިފައިވާ ކަމަށެވެ.
ގަރާރާއި ގުޅިގެން ވާހަކަ ދައްކަވަމުން ޝަރީފު ވިދާޅުވީ ޖިންސީ ގޯނާގެ މައްސަލަތަކުގެ ޝިކާރައަކަށްވާ ފަރާތްތަކަށް އިންސާފު ހޯދައިދޭން ޖެހޭކަމަށެވެ. އަދި އެ އަމަލު ހިންގާ ފަރާތްތަކަށް އަވަސް އަދަބު ދިނުމަށް އޭނާ ގޮވައިލެއްވި އެވެ.
