ރަސްމީ ލިޔެކިޔުންތަކުގައި ރެވެނިއު ސްޓޭމްޕު ޖެހުން އުވައިލަން ރައްޔިތުންގެ މަޖިލީހުން ފާސްކޮށްފި އެވެ.
1970 ވަނަ އަހަރުން ފެށިގެން އަމަލުކުރަމުން އަންނަ ގާނޫނެއްގެ ދަށުން ރާއްޖޭގައި އަންނަނީ ރެވެނިއު ސްޓޭމްޕް ބޭނުން ކުރަމުންނެވެ.
މި ގާނޫނު އުވާލުމަށް ރައްޔިތުންގެ މަޖިލީހަށް ސަރުކާރުގެ ފަރާތުން ބިލެއް ހުށަހެޅުއްވީ މެދުހެންވޭރު ދާއިރާގެ މެމްބަރު އަލީ އާޒިމް އެވެ.
މި ބިލް ދިރާސާކޮށް މުޅި މަޖިލީހުގެ ކޮމެޓީން ނިންމި ގޮތަށް މަޖިލީހުން މިއަދު ފާސްވީ ޖަލްސާގައި ބައިވެރިވެވަޑައިގެންނެވި 45 މެމްބަރުންގެ ތެރެއިން 44 މެމްބަރުންގެ ވޯޓުން ނެވެ.
މި ގާނޫނު އުވައިލީ ރެވެނިއު ސްޓޭމްޕް ޖެހުމުގެ ނިޒާމު ހިންގުމަށްތަކައި ހިނގާ ހަރަދާ އަޅާބަލާ އިރު ލިބޭ އާމްދަނީ އެކަށީގެން ނުވާތީ އެވެ. އަދި އެ ގާނޫނަކީ ވަރަށް ދުވަސްވެފައިވާ ގާނޫނެއްކަމަށްވެސް ވަނީ ބުނެފަ އެވެ.
މިއާއެކު އާންމު ވިޔަފާރިތަކަށްވެސް ލުއި ފަސޭހަތަކެއް ލިބިގެން ދާނެ ކަމަށް އާޒިމް ހުށަހެޅުއްވި ބިލުގައި ވަނީ ބުނެފަ އެވެ.
