ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ ވެރިކަމެއް ދެން މި ރާއްޖެއިން ނުފެންނާނެކަމަށް ކުރީގެ ނައިބު ރައީސް އަދި މަޝްހޫރު ގާނޫނީ ވަކީލު ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
ރޭ ކްލަބް ހައުސް މެދުވެރިކޮށް ގެނަސްދިން މަޖިލީހުގެ ހާއްސަ ޕްރޮގުރާމް "އާސްކް ސްޕީކާޒް" ގައި ވާހަކަ ދައްކަވަމުން ނަޝީދު ވަނީ 2023 ގައި ރިޔާސީ އިންތިހާބެއް ބާއްވާނަމަ އެމްޑީޕީގެ ކެނޑިޑޭޓަކަށް ވާނީ އެމަނިކުފާނުކަމަށް ވިދާޅުވެފަ އެވެ. އެކަމަށްޓަކައި އެމްޑީޕީގެ ޕްރައިމަރީގައި ވާދަކުރައްވަން ތައްޔާރަށް ހުންނެވި ކަމަށްވެސް ނަޝީދު ރޭ ވިދާޅުވި އެވެ.
މިކަމަށް ފާޑު ވިދާޅުވެ ޖަމީލު މިއަދު ވިދާޅުވީ ރައްޔިތުން ވަނީ ވެރިކަމުގެ ނިޒާމު ކަނޑައަޅާފައި ކަމަށެވެ. ރަދި އެފަހަރު ރައްޔިތުން ރައީސް ނަޝީދަށް ބުނީ ނޫނެކޭ ކަމަށް އޭނާ ވިދާޅުވި އެވެ. ޖަމީލު މި ފާހަގަ ކުރެއްވީ 2007 ވަނަ އަހަރު ރާއްޖެ ހިންގުމުގެ ނިޒާމު ކަނޑައެޅުމަށް ބޭއްވި ފެންނަ ނުފެންނަ ވޯޓުން ނަޝީދު ތާއީދު ކުރެއްވި ބަރުލަމާނީ ނިޒާމު ބަލިވުމާއި ގުޅިގެން އެކަމަށެވެ.
ނިޒާމުގެ ވާހަކަ ޖަމީލު މި ފާހަގަކުރެއްވީ ރާއްޖޭގައި ބަރުލަމާނީ ނިޒާމެއް އޮންނަން ބޭނުންވާ ކަމަށާއި އެކަމަށްޓަކައި 2023 ވަނަ އަހަރުގެ ރިޔާސީ އިންތިހާބު ނުބާއްވައި އޭގެ ބަދަލުގައި މަޖިލިސް އިންތިހާބެއް ބޭއްވުމާއިއެކު މަޖިލީހުން ބޮޑުވަޒީރަކު ކަނޑައެޅުމަށް ތާއީދު ކުރައްވާކަމަށް ނަޝީދު މީގެ ކުރިްނ ވިދާޅުވެފައި ވަނިކޮށެވެ. ރޭގެ ވާހަކަފުޅުގައިވެސް ނަޝީދުގެ ވާހަކަފުޅު ހުންނެވީ 2023 ވަނަ އަހަރުގެ ރިޔާސީ އިންތިހާބު ބޭއްވުމާއި ދެކޮޅު މޭރުމަކުންނެވެ.
"ޕާޓީ އެކްޓިވިސްޓުން ޗާޖު ކުރަން ދައްކަންވެސް ނިޒާމުގެ ވާހަކަ މިހާރު ބާވެއްޖެ"
- ޑރ. މުހައްމަދު ޖަމީލު އަހުމަދު
ޖަމީލު ވިދާޅުވީ ނަޝީދުގެ ވެރިކަން ދެން ރާއްޖެއަކުން ދުވަހަކުވެސް ނުފެންނާނެ ކަމަށެވެ.
ޖަމީލު ނަޝީދަށް ފާޑު ވިދާޅުވި އިރު މިހާރު ރައީސްކަމުގައި ހުންނެވި ރައީސް އިބްރާހިމް މުހައްމަދު ސޯލިހުގެ ވެރިކަމަށް ނަޝީދު ގެންދަވަނީ ދޭތެރެ ދޭތެރެއިން ފާޑު ވިދާޅުވަމުންނެވެ. ހާއްސަކޮށް މިދިޔަ ލޯކަލް ކައުންސިލް އިންތިހާބަށްފަހު އެމްޑީޕީގެ އެތެރޭގައި ދެ ފެކްޝަނެއް އުފެދިފައިވާކަމުގެ އަޑުތައް ވަނީ ފެތުރިފަ އެވެ. މިހާރު ރައްޔިތުންގެ މަޖިލީހާއި ސަރުކާރާއި ދެމެދުވެސް ބޮޑެތި ކޯޅުންތަކެއް ވަނީ އުފެދިފަ އެވެ. ރައްޔިތުންގެ މަޖިލީހުގެ 65 މެމްބަރުން އެމްޑީޕީން ތަމްސީލު ކުރިނަމަވެސް އޭގެ ތެރޭގައި ދެ ފިކުރެއް އުފެދިފައިވާއިރު އޭގެ ތެރެއިން މެޖޯރިޓީ ހިއްސާވަނީ ރައީސް ސޯލިހަށް ތާއީދު ކުރައްވާ މެމްބަރުން ކަމަށް ބެލެވެ އެވެ.
2023 ވަނަ އަހަރު ރިޔާސީ އިންތިހާބުގައި ވާދަކުރެއްވުމާއިމެދު ވަކި ގޮތެއް ނުނިންމަވާކަމަށް ރައީސް ސޯލިހު ވިދާޅުވި ނަމަވެސް ވައުދުތައް ފުއްދެވުމަށް ދެ ދައުރު ބޭނުންވާކަމަށް ދެކެވަޑައިގަންނަވާކަމަށް ރައީސް އޮފީހުގެ ސްޕޯކްސްޕާސަން މަބުރޫކު އަޒީޒު މީގެ ކުރިން ވަނީ ވިދާޅުވެފަ އެވެ.
ރައީސް ނަޝީދާއި ރައީސް ސޯލިހު ޕްރައިމަރީގައި ވާދަކުރައްވާނަމަ ބެލެވޭ ގޮތުގައި ކާމިޔާބު ކުރައްވާނީ ރައީސް ނަޝީދެވެ. އެއީ އެމްޑީޕީގެ އާންމު މެމްބަރުންގެ ތެރޭަގައި ރައީސް ސޯލިހަށް އޮތް ތާއީދު ވަރަށް ކުޑަކަމަށް ލަފާކުރެވޭތީ އެވެ.
