މިއަހަރުގެ ޖެނުއަރީން ޖުލައި 1 ގެ ނިޔަލަށް ޖޫރިމަނާގެ ގޮތުގައި ދައުލަތަށް 119.6 މިލިއަން ރުފިޔާގެ އާމްދަނީއެއް ލިބިއްޖެ އެވެ.
ފިނޭންސް މިނިސްޓްރީން އާންމުކުރި ތަފާސް ހިސާބުތައް ދައްކާ ގޮތުން މިއަހަރު ލިބުނު އާމްދަނީ މިދިޔަ އަހަރުގެ މިމުއްދަތުގައި ލިބުނު އާމްދަނީއަށްވުރެއް ބޮޑުތަން ވަނީ އިތުރުވެފަ އެވެ. މިދިޔަ އަހަރު ލިބުނީ 69.4 މިލިއަން ރުފިޔާ އެވެ.
މިއަހަރު ޖޫރިމަނާގެ ގޮތުގައި ލިބޭނެ ކަމަށް ސަރުކާރުން އަންދާޒާ ކުރީ 43.9 މިލިއަން ރުފިޔާ އެވެ. އެހެންނަމަވެސް އަހަރު ދެބައިވި އިރު މިވަނީ އެއަދަދުގެ ދެގުނައަށްވުރެއް ބޮޑު އަދަދެއް ޖޫރިމަނާގެ ގޮތުގައި ދައުލަތަށް ލިބިފަ އެވެ.
މިދިޔަ 2019 ވަނަ އަހަރު ޖޫރިމަނާގެ ގޮތުގައި ލިބުނީ 235.3 މިލިއަން ރުފިޔާ އެވެ. ޖެހިގެން އައި 2020 ވަނަ އަހަރު މި އަދަދު ވަރަށް ބޮޑަށް ދަށަށް ދިޔަ އެވެ. އެގޮތުން މިދިޔަ އަހަރު ނިމުނުއިރު ޖޫރިމަނާގެ ގޮތުގައި ލިބުނީ 146.2 މިލިއަން ރުފިޔާ އެވެ. މިދިޔަ އަހަރު ލިބުނު ޖޫރިމަނާ ދަށަށް ދިޔައީ ގިނަ ދުވަސްތަކެއް ވަންދެން މާލެ ސަރަހައްދު ލޮކްޑައުންކޮށް، ގިނަ ވަގުތު ތަކެއްގައި ކާފިއު ހިންގުމުން ކަމަށް ބެލެވެ އެވެ.
މިއަހަރު ޖޫރިމަނާގެ ފައިސާގެ ބޮޑު ބައެއް ލިބޭނެކަމަށް ސަރުކާރުން އަންދާޒާ ކުރަނީ ގާނޫނާއި ގަވާއިދުތަކާއި ހިލާފުވެގެންނެވެ. އެގޮތުން 14 މިލިއަން ރުފިޔާ އެކަމުން ލިބޭނެ ކަމަށް އަންދާޒާ ކުރާއިރު ގަވާއިދާއި ހިލާފުވެގެން 10 މިލިއަން ލިބޭނެކަމަށް ލަފާ ކުރެ އެވެ.
މީގެ އިތުރުން މުވައްޒަފުންގެ ގަޑީގެ ލާރިއާއި ޖޫރިމަނާގެ ގޮތުގައިވެސް 8.7 މިލިއަން ލިބޭނެ ކަމަށް ސަރުކާރުން ލަފާކުރެ އެވެ. އަދި ޓްރެފިކް ވައޮލޭޝަންގެ ގޮތުގައި 5.2 މިލިއަން ރުފިޔާ ލިބޭނެ ކަމަށް ވަނީ ލަފާކޮށްފަ އެވެ.
