ކޮވިޑް-19 ވެކްސިންގެ ދެ ޑޯޒް ޖަހައި، ދެހަފްތާގެ މުއްދަތު ފުރިހަމަ ކުރުމުން ރަށްރަށަށް ދަތުރު ކުރެވޭ ގޮތަށް އުސޫލު ބަދަލުކޮށްފި އެވެ.
ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ، ރިޒޯޓު މުވައްޒަފުންނަށް ރަށްރަށަށް ދެވޭނީ މިމަހުގެ 30 ވަނަ ދުވަހުން ފެށިގެންކަމަށެވެ. އެ ތާރީހުގެ ފަހުންވެސް ދެވޭނީ މޮނިޓަރިންގް ހާލަތުގައި ނެތް ރަށްރަށަށެވެ.
މިގޮތަށް ދަތުރު ކުރުމުގެ ހުއްދަ ދޭނީ މޮނިޓަރިންގައި ނެތް ރިޒޯޓުތަކުގެ މުވައްޒަފުންނަށެވެ. އަދި ކޮންމެ މަހަކު ރިޒޯޓުތަކުގައި ރެންޑަމް ސާމްޕަލިން ނަގައި މުވައްޒަފުންގެ 10 އިންސައްތަ ފުރިހަމަ ކުރަން ޖެހެ އެވެ.
މުޅި ރާއްޖޭގައި ކޮވިޑަށް ޕޮޒިޓިވްވާ މީހުންގެ އަދަދު ވަނީ ވަރަށް ބޮޑަށް ދަށަށް ގޮސްފަ އެވެ. މިއާއެކު މާލެ ސަރަހައްދުގެ ފިޔަވަޅުތަކަށްވެސް މާދަމާއިން ފެށިގެން ލުއިތަކެއް ދޭން ސަރުކާރުން ވަނީ ނިންމައިފަ އެވެ.
އެގޮތުން މާދަމާއިން ފެށިގެން މާލެ ސަރަހައްދުގައި ކާފިއު ވަގުތު އުވާލަން ނިންމައި ވިޔަފާރިތައް ހުޅުވާލަން ނިންމާފައިވާއިރު، 30 މީހުންނަށްވުރެއް މަދުން އެއްވެ އުޅުމުގެ ހުއްދަވެސް ވަނީ ދީފަ އެވެ. މީގެ އިތުރުން ވެކްސިން ފުރިހަމަކޮށް ޕީސީއާރު ނެގެޓިވް ޓެސްޓަކާއިއެކު ކަރަންޓީނު ނުވެ ދަތުރު ކުރެވޭގޮތަށްވެސް ވަނީ އުސޫލު ބަދަލުކޮށްފަ އެވެ.
