ބަންދުގެ މުއްދަތު އިތުރު ކުރަން މިއަދު ކޯޓަށް ގެންދިއުމުން ބަންދުން ދޫކޮށްލަން އަމުރު ނެރުނު ތިން މީހުންނަކީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާއާއި ގުޅުންހުރި މީހުން ނޫންކަމަށް ފުލުހުން ބުނެފި އެވެ.
މައުލޫމާތު ލިބިފައިވާ ގޮތުގައި މިއަދު ކޯޓުން ދޫކޮށްލީ ރައީސް ނަޝީދަށް ދިން ހަަމަލާއާއި ގުޅިގެން ހަރުކަށި ފިކުރުގެ މީހުންނާއި ދެކޮޅަށް ހިންގި އޮޕަރޭޝަނެއްގެ ތެރެއިން ހައްޔަރު ކުރި ތިން މީހެކެވެ. ކޯޓުން އެމީހުން ދޫކޮށްލީ ބަންދު ކުރަން ޖެހޭފަދަ ހެއްކެއް ފުލުހުންނަށް ދެއްކިފައި ނުވާތީ ކަމަށް ކްރިމިނަލް ކޯޓުގެ ގާޒީ ވަނީ ކަނޑައަޅައިފަ އެވެ.
އެހެންނަމަވެސް ޕްރޮސެކިއުޓާ ޖެނެރަލް ހުސައިން ޝަމީމް ވިދާޅުވީ ބަންދު ކުރެވޭ މިންވަރަށް ހެކި ހުރި ކަމަށާއި އެއަމުރު އިސްތިއުނާފު ކުރަން ހައި ކޯޓަށް ހުށަހަޅާނެ ކަމަށެވެ.
މައުލޫމާތު ލިބޭ ގޮތުގައި ދޫކޮށްލި ތިން މީހުންނަކީވެސް ޓެރަރިޒަމްގެ ތުހުމަތު ކުރެވޭ މީހުންނެވެ.
ރައީސް ނަޝީދުގެ ހަމަލާއާއި ގުޅިގެން 8 މީހެއްގެ މައްޗަށް ތަހުގީގު ހިންގާ ކަމަށް ރައީސް އިބްރާހިމް މުހައްމަދު ސޯލިހު މީގެ ކުރިން ވިދާޅުވި އެވެ. އަދި އޭގެ ތެރެއިން ހަތަރު މީހެއްގެ މައްޗަށް ދައުވާކުރަންވެސް ވަރަށް އަވަހަށް ފޮނުވާނެ ކަމަށް ވިދާޅުވި އެވެ.
