މިއަހަރުގެ ހައްޖު ދުވަހަކީ މިހިނގާ ޖުލައި މަހުގެ 19 ވަަނަ ދުވަސް ކަމަށް ސައުދީ އަރަބިއްޔާއިން ކަނޑައަޅައިފި އެވެ.
މިއާއެކު އަޟްހާ އީދު ދުވަހަށް ވަނީ ޖެހިގެން އަންނަ ޖުލައި 20 ވާ އަންގާރަ ދުވަހަށެވެ. އަޟްހާ އީދަކީ ތިން ދުވަހަށް ދެމިގެންދާ މުނާސަބަތެކެވެ. ޖެހިގެން އަންނަނީ ހަފްތާ ބަންދެއްކަމުން ސަރުކާރު ބަންދު ފަސް ދުވަސް މި އަހަރުގެ އީދާއިއެކު ރާއްޖޭގައި ލިބޭނެ އެވެ.
މާދަމާއަކީ ހައްޖު މަހުގެ އެއްވަނަ ދުވަހެވެ. މާދަމާއިން ފެށިގެން 10 ދުވަހަކީ އިސްލާމް ދީނުގައި މާތް ދުވަސްތަކުގެ ގޮތުގައި ގުނާ ދުވަސްތަކެވެ. އާންމު ގޮތެއްގައި މީގެ ފުރަތަަމަ ނުވަ ދުވަހު މުސްލިމުން ތިބެނީ ރޯދަ އަށެވެ. ޖެހިގެން އަންނަ ދުވަހަކީ އަޟްހާ އީދު ދުވަހެވެ.
ރާއްޖޭގައި އަޟްހާ އީދު ހާއްސަ ވަނީ އެކި ކަހަލަ ކުޅިވަރާއި ކުލަތަކުން ޒީނަތްވާ މުނާސަބަތަކަށެވެ. މިދިޔަ އަހަރުގެ އީދަކީ ކޮވިޑް-19 ގެ ސަބަބުން ރާއްޖޭގެ ރަށްތަކުގައި މާ ކުލަ ގަދަކޮށް ފާހަގަކުރި އީދެއް ނޫނެވެ.
އެހެންނަމަވެސް މި އަހަރު ކޮވިޑުގެ ހާލަތު ވަރަށް ބޮޑަށް ރަނގަޅުވެފައިވުމުން، ދަތުރު ކުރުމުގައިވެސް ލުއިތަކެއް ދީފައިވާތީ އީދު ފޯރި ގަދަ ވާނެ ކަމަށް އޮތީ ބެލެވިފަ އެވެ. އެހެންނަމަވެސް އެޗްޕީއޭއިން ވަނީ ކޮވިޑުގެ ބަލިމަޑުކަން އޮތް ރަށްރަށުގައި އެއްވެ އުޅުން މަނާކޮށްފަ އެވެ. އެންމެ އާބާދީ ބޮޑު މާލެ ސަރަހައްދުގައިވެސް 30 މީހުންނަށްވުރެއް ގިނައިން އެއްވެ އުޅުން އޮތީ މަނާކޮށްފަ އެވެ.
