ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުހައްމަދު ނާޒިމް އާ ސިޔާސީ ޕާޓީއެއް އުފައްދަވަން ނިންމަވައިފި އެވެ.
ޑިފެންސް މިނިސްޓަރުކަންވެސް ކުރައްވާފައިވާ ނާޒިމް ސިޔާސީ ޕާޓިއެއް ހެއްދެވުމަށް ވަނީ 3،000 މެމްބަރުންގެ ސޮއިވެސް ހޯއްދަވައިފަ އެވެ. އޭގެ ތެރޭގައި މަޖިލީހުގައި ހިމެނިވަޑައިގަންނަވާ ބައެއް މެމްބަރުންވެސް އެބަ ތިއްބެވެ.
މިވަގުތު ޖުމްހޫރީ ޕާޓީގެ މެމްބަރެއްގެ ގޮތުގައި ހުންނެވި ނާޒިމް އާއިއެކު މަޖިލީހުގެ ހަތަރު މެމްބަރަކު އާ ޕާޓީއަށް ސޮއިކުރަން ވަނީ ނިންމަވައިފަ އެވެ. އޭގެ ތެރޭގައި ކިނބިދޫ ދާއިރާގެ މެމްބަރު އަދި ކުރީގެ ސީޕީ އަބްދުﷲ ރިޔާޒުވެސް ހިމެނިވަޑައިގަންނަވަ އެވެ.
ނާޒިމް އުފައްދަވާ ސިޔާސީ ޕާޓީގެ އިތުރު މައުލޫމާތު ކުރިއަށް އޮތް ހަފްތާއެއްހާ ދުވަހުގެ ތެރޭގައި އިއުލާން ކުރައްވާނެކަމަށް މައުލޫމާތު ލިބެ އެވެ.
އިލެކްޝަންސް ކޮމިޝަންގައި މިހާރު ރަޖިސްޓްރީ ކޮށްގެން ހިންގަމުން ދަނީ 10 ސިޔާސީ ޕާޓީއެކެވެ. ނާޒިމް އާ ސިޔާސީ ޕާޓީއެއް އުފައްދަވައިފި ނަމަ ވާނީ 11 ވަނަ ޕާޓީ އަށެވެ. އެންމެ ފަހުން އިލެކްޝަންސްގައި ރަޖިސްޓްރީ ކުރީ ކުރީގެ ރައީސް މައުމޫނު އަބްދުލް ގައްޔޫމުގެ އެމްއާރުއެމް އެވެ.
ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެންނެވުމުގެ ކުރިން ނާޒިމް ހުންނެވީ އިދިކޮޅު ޕީޕީއެމްގަ އެވެ. އޭނާ ޑިފެންސް މިނިސްޓަރު ކަމުގައި ހުންނަވަނިކޮށް ދިރިއުޅުއްވާ ގެއިން ފިސްތޯލައެއް ފެނުނު މައްސަލައިގައި ނާޒިމް ޖަލަށް ލިއެވެ. ޖަލުން މިނިވަންވެވަޑައިގެން ނާޒިމް ޖުމްހޫރީ ޕާޓީއާއި ގުޅިވަޑައިގެންނެވީ 2019 ވަނަ އަހަރުގެ ތެރޭގަ އެވެ. އެހެންނަމަވެސް އޭނާ މިހާރު ހުންނެވީ ޖޭޕީގެ ބައެއް ސިޔާސަތުތަކާއިމެދު ހިތްހަމަޖެހިވަޑައިނުގެން މަސައްކަތާއި ދުރަށް ޖެހިވަޑައިގެނެވެ.
