ސްރީލަންކާގައި ތިބި ދިވެހިން ރައްކާތެރިކަމުގެ ފިޔަވަޅު އަޅައި، ކާބޯތަކެތިވެސް ހޯދުމަށްފަހު ރައްކާކޮށްފައި ބެހެއްޓުމަށް އަންގައިފިއެވެ.
ލަންކާގައި ހުންނަ ރާއްޖޭގެ ހައިކޮމިޝަނުން ނެރުނު ބަޔާނެއްގައި ބުނާގޮތުގައި ތޫފާން ޑިޓްވާގެ ސަބަބުން ބޯކޮށް ވާރޭވެހި ފެންބޮޑުވެ، ކަނޑު ގަދަވެ، ބިންގަނޑު ކަނޑައިގެން ދިޔުންފަދަ ނުރައްކާތެރި ހާދިސާތައް ހިނގަމުންދާ ކަމަށާއި މިހާރުވެސް އެގައުމުގައި ރަތް ސަމާލު ނެރެފައިވާ ކަމަށެވެ.
އެހެންކަމުން އެގައުމުގައި ދިރިއުޅުއްވާ ރައްޔިތުންނާއި އެގައުމަށް ދަތުރުކުރައްވާ ދިވެހިންގެ ސަލާމަތަށްޓަކައި ގިނަ ކަންތައްތަކަށް ސަމާލުވުމަށް ވަނީ އަންގާފައެވެ. އެގޮތުން:
- ކޮންމެހެން ކުރަންޖެހިއްޖެ ހާލަތެއްގައި މެނުވީ ދަތުރުފަތުރު ނުކުރެއްވުމަށާއި ހާއްސަކޮށް ފެންބޮޑުވެ، ބިންގަނޑު ކަނޑައިގެން ދިޔުމުގެ ހާދިސާތައް ހިނގާ ސަރަހައްދުތަކަށް ދަތުރުފަތުރު ނުކުރެއްވުން
- ބޯކޮށް ވާރޭވެހި، ވައިގަދަވާ ވަގުތުތަކުގައި ގެއިން ބޭރަށް ނުކުމެ ނޫޅުން
- ލަންކާގެ މޫސުމާއި ބެހޭ އިދާރާ އަދި ޑިސާސްޓާ މެނޭޖަމްނަޓު ސެންޓަރުން ދެއްވާ އަދާހަމަ މައުލޫމާތާ އެއްގޮތަށް އަމަލުކުރައްވައި އެފަރާތްތަކުން އަންގަވާ އެންގެވުންތަކަށް ސަމާލުކަން ދެއްވުން
- ޒަރޫރީ ބޭނުންތަކަށް ބޭނުންވާ ކާޑޫގެ ބާވަތްތަކާއި ފެނާއި ބޭސްފަދަ ސާމާނު ހޯއްދަވައި ރައްކާތެރި ތަންތަނުގައި ބެހެއްޓުމާއި އަދި މޮބައިލް ފޯން ޗާޖު ކުރައްވައި މުހިންމު ލިޔެކިޔުންތައް ރައްކާތެރިކަމާއެކު ބެލެހެއްޓުން
- މި ވިއްސާރައިގައި ކޯރުތައް ފުރި ބަންޑުންވަމުންދާ ކަމުގެ އިންޒާޜު ކަމާއި ބެހޭ ފަރާތްތަކުން ދީފައިވާތީ އެފަދަ ސަަރަހައްދުތަކުގައި ދިރިއުޅުއްވާ ފަރާތްތަކާއި ބިން ތިރި ސަރަހައްދާއި މޫދާ ކައިރި ސަރަހައްދުތަކުގައި ދިރިއުޅުއްވާ ފަރާތްތަކަށް ހާއްސަ ސަމާލުކަމެއް ދެއްވައިގެން މިވަގުތު ރައްކާތެރި ސަރަހައްދުތަކަށް ބަދަލުވެވަޑައިގަތުން
- މާލެ ދަތުރުކުރައްވާ ބޭފުޅުން ދުރާލާ ވަގުތު އޮތްވާ އެއާޕޯޓަށް ދަތުރުފެއްޓުން އަދި ކަމާއި ގުޅޭ އިދާރާތަކުން އަދާހަމަ މައުލޫމާތު ހޯއްދެވުމަށް ވަނީ އަންގާފައެވެ.
ހަމައެއާއެކު ރާއްޖޭގެ ހައިކޮމިޝަނުގެ އެހީތެރިކަމެއް ނުވަތަ މައުލޫމާތެއް ބޭނުނފުޅުވާނަމަ 9476881666 އަށް ގުޅުއްވުން ނުވަތަ އީމެެއިލް މެދުވެރިކޮށް މައުލޫމާތު ހޯދުމަށް ވަނީ އަންގާފައެވެ.
