އެމްޑީޕީގެ ވަގުތީ ޗެއާާޕާސަންގެ މަގާމުވަގުތީ ގޮތުން ކުރައްވާނެ ބޭފުޅަކު ކަނޑައެޅުމަށް މިރޭ ބޭއްވި ގައުމީ މަޖިލިހުގެ ބައްދަލުވުން "ނިޒާމު ގެއްލިފައިވާކަމަށް ބުނެ" މެދުކަނޑާލައިފި އެވެ.
އެ މަގާމުގެ މަސްއޫލިއްޔަތުތައް ވަގުތީގޮތުން އަދައިކުރަން ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދުގެ ނަން ހުށަހެޅި ނަމަވެސް 47 ވޯޓުން އޭނާ ވަނީ ފެއިލްވެފަ އެވެ. އެއީ އެމަގާމަށް ހޮވެން ފެންނަކަމަށް ކަނޑައަޅަން 48 ވޯޓު ބޭނުންވާތީ އެވެ.
އެނގިފައިވާ ގޮތުގައި އެ މަގާމަށް ދެ ނަމެއް ހުށަހަޅަން މަސައްކަތްކުރިއެވެ. އެއީ މަޖިލީހުގެ ރައީސްކަން ކުރެއްވި، ހިތަދޫ އުތުރު ދާއިރާގެ ކުރީގެ މެންބަރު މުޙައްމަދު އަސްލަމްގެ ނަމާއި، ވަހީދުގެ ނަމެވެ.
އަސްލަމްގެ ނަން ހުށަހަޅަން މަޝްވަރާކުރީ ކުރީގެ ރައީސް އިބްރާހިމް މުޙައްމަދު ޞާލިހަށް ތާއީދުކުރައްވާ ފެކްޝަންގެ ތެރެއިންނެވެ. ވަހީދު ނަން ހުށަހެޅީ، ކުރީގެ ރައީސް މުޙައްމަދު ނަޝީދަށް ތާއީދުކުރައްވާ ފެކްޝަނުގެ ތެރެއިންނެވެ.
