ގައުމުތަކުން ފަލަސްތީނުގެ ރައްޔިތުންނަށް ދެމުންދާ އެއްބާރުލުން އަމަލީ ފިޔަވަޅުތަކަށް ބަދަލުކޮށް އިސްރާއީލުން ހިންގާ ގަތުލުއާންމު ހުއްޓުވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގޮވާލައްވައިފިއެވެ.
ފަލަސްތީނުގެ ރައްޔިތުންނާއެކު އެކުވެރިކަން ފާޅުކުރުމުގެ ބައިނަލްއަގުވާމީ ދުވަސް ފާހަގަކުރުމުގެ ގޮތުން ރައީސް ކުރެއްވި ޕޯސްޓެއްގައި ވިދާޅުވެފައިވަނީ ފަލަސްތީނުގެ ރައްޔިތުންނާއެކު ބައިނަލްއަގުވާމީ އެއްބާރުލުން ފާޅުކުރުމުގެ ދުވަސް ފާހަގަކުރަމުންދާއިރު، އެ ބިންތަކުގައި ދިރިިއުޅޭ ރައްޔިތުންގެ ހާލަތަށް އަދިވެސް އެއްވެސް ބަދަލެއް ނާންނަ ކަމަށާއި ގައުމުގެ ހާލަތު ވަރަށް ގޯސް ކަމަށެވެ. ހަނގުރާމަ ހުއްޓާލުމުގެ އެއްބަސްވުންތަކަށް އިސްރާއީލުން އަމަލުނުކުރުމާއި، ޣައްޒާއަށް ދެމުންދާ ބަދަލެއްނެތް ހަމަލާތަކާއި، ވަޒަންވެރިވުން އިތުރުކުރަމުންދާ ދިއުމާއި، ދުޅަހެޔޮ ދިރިއުޅުމަށް ހުރަސްތައް ގިނަވުމުގެ ސަބަބުން، ފަލަސްތީނުގެ ރައްޔިތުންނަށް ސުލްހަވެރިކަމާއި، އިގްތިސާދީ ގޮތުން ކުރިއަރާނެ މުސްތަގުބަލެއްގެ އުންމީދު ފަނޑުވެފައިވާކަން އެމަނިކުފާނު ފާހަގަކުރެއްވިއެވެ.
މި ނާޒުކު ދަނޑިވަޅުގައި، ބައިނަލްއަގުވާމީ މުޖުތަމައުން ފަލަސްތީނުގެ ރައްޔިތުންނަށް ދެމުންދާ އެއްބާރުލުން، އަމަލީ ފިޔަވަޅުތަކަކަށް ބަދަލުކުރުމަށް ރައީސުލްޖުމްހޫރިއްޔާ ވަނީ ގޮވާލައްވާފައެވެ. އަދި ފަލަސްތީނުގެ ރައްޔިތުންގެ ޝަރުއީ ހައްގުތަކާއި އެދުންތައް ފުރިހަމައަށް ހާސިލްކުރުމަށް ޓަކައި، އެންމެން ގުޅިގެން މަސައްކަތްކުރުމުގެ މުހިންމުކަން އެ ލމަނިކުފާނު ވަނީ ފާހަގަކުރައްވާފައެވެ.
ދިވެހިރާއްޖެއިން ވަނީ، ފަލަސްތީނުގެ ރައްޔިތުންނާއެކު ސާބިތުކަމާއެކު ތިބޭނެކަމުގެ ޔަގީންކަން ރައީސްގެ މެސެޖުގައި އަނެއްކާ ވެސް އައުކޮށްފައެވެ. އަދި 1967 ވަނަ އަހަރަށްވުރެ ކުރީގެ ބޯޑަރުތަކުގެ މައްޗަށް ބިނާވެފައިވާ، އިރުމަތީ ގުދުސްއަކީ އެ ގައުމުގެ ވެރިރަށެއް ކަމުގައިވާ މިނިވަން ދައުލަތެއްގެ ގޮތުގައި ފަލަސްތީނު ބަލައިގަތުމަށް ދިވެހިރާއްޖެއިން ދެމުންދާ ވަރުގަދަ ތާއީދު ވެސް ވަނީ ތަކުރާރުކޮށްފައެވެ.
މި ދުވަސް ފާހަގަކުރުމުގެ މަގްސަދަކީ ފަލަސްތީނުގެ ރައްޔިތުންނަށް ކުރިމަތިވެފައިވާ ގިނަގުނަ ދަތިކަންތައްތަކަށް ބައިނަލްއަގުވާމީ މުޖުތަމައުގެ ސަމާލުކަން ހޯދައި، އެ ރައްޔިތުންގެ ހައްގުތައް ހޯދައިދިނުމަށް އަޅަންޖެހޭ ފިޔަވަޅުތައް އަޅަން ގޮވާލުމެވެ.
