މާފަންނު މެދު ދާއިރާގެ ރައްޔިތުންނަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބާއްވަވާ ބައްދަލުވުމަކާ ގުޅޭ ގޮތުން ފޮނުއްވި މެސެޖަކާ ހެދި، އެ ދާއިރާގެ މަޖިލިސް މެންބަރު އަސްމާ ރަޝީދު (އަސްމާއްތަ) މައާފަށް އެދިވަޑައިގެންފިއެވެ.
ރައީސް ޑރ. މުއިއްޒު އާ ސުވާލު ކުރައްވަން ބޭނުން ނަމަ، އަދި ސިޓީ، ނޯޓުކޮޅެއް ރައީސަށް ދެއްވަން ބޭނުންފުޅު ނަމަ، އޭނާ އަތަށް ދެއްވުމަށް ވެސް އަސްމާ އެދިވަޑައިގެންފައިވާއިރު ރައީސް ވަނީ ރައްޔިތުންނާއެކުގައި ބާއްވަވާ ބައްދަލުވުންތަކުގައި އެމަނިކުފާނާ ބޭނުން ސުވާލެއް ކުރެއްވޭނެ ކަމަށާއި ބައްދަލުވުމަށް ފަހު ސިޓީ، ނޯޓެއް ދެއްވަން ބޭނުންފުޅު ނަމަ، ސީދާ އެމަނިކުފާނު އަތްޕުޅަށް އެރުވޭނެ ކަމަށް ވިދާޅުވެފައެވެ.
އަސްމާ ނެރުނު ބަޔާނެއްގައި ބުނީ ޑިސެންބަރު 4 ވަނަ ދުވަހު މާފަންނު ރައްޔިތުންނާއެކު ބާއްވާ ބައްދަލުވުމާއި ގުޅޭ ގޮތުން އެ ދާއިރާގެ މެންބަރެއްގެ ހައިސިއްޔަތުން ފޮނުވި މެސެޖުގެ މާނަ އޮޅޭ ގޮތަށް ސޯޝަލް މީޑިއާގައި ދަުރުކުރަމުން އަންނަކަމަށެވެ. އެ މެސަޖަކީ ޖަލްސާގައި އެއްވެސް ސަބަބަކާ ހުރެ ރައީސް އަށް ސީދާ ސުވާލުކުރުމުގެ ފުރުސަތު ނުލިބޭ ފަރާތްތަކުގެ ހިޔާލާ ފިކުރު ރައީސް އާއި ހަމައަށް ޔަގީންކަމާއެކު ފޯރުކޮށްދިނުމުގެ މަގުސަދުގައި އެ ދާއިރާގެ ރައްޔިތުންގެ ހައްގުގައި އަމިއްލަ ހައިސިއްޔަތުން ފޮނުވި މެސެޖެއް ކަމަށް އަސްމާ ވިދާޅުވިއެވެ.
އަސްމާ ވިދާޅުވީ މާފަންނު މެދު ދާއިރާގެ ކޮންމެ ރައްޔިތަކަށްވެސް، އެ ރައްޔިތެއްގެ ހިޔާލާ ކަންބޮޑުފުންތައް ފާޅުކުރުމުގެ ފުރުސަތު ލިބުމަކީ މުހިއްމު ކަމެއް ކަމަށެވެ.








