އެސްޕަޔާ އަދި އަރައިސް މަޝްރޫއުތަކުގެ ދަށުން ދިވެހިރާއްޖޭގެ 10 އަތޮޅެއްގެ 23 ރަށެއްގައި ސޯލާ ޕީވީ ސިސްޓަމް ބެހެއްޓުމަށް ހަމަޖެހިއްޖެއެވެ.
ތިމާވެށްޓާއި ބެހޭ ވުޒާރާއިން ވިދާޅުވީ ރާއްޖޭގެ 10 އަތޮޅެއްގެ 23 ރަށެއްގައި ސޯލާ ޕީވީ ސިސްޓަމް ބެހެއްޓުމަށް ނިންމާފައިވާ ކަމަށެވެ. އެ ރަށްތަކުގެ ތެރޭގައި ފުވައްމުލަކު ސިޓީވެސް ހިމެނޭ ކަމަށް ވެސް ވިދާޅުވިއެވެ. އަދި އެ މަޝްރޫއުތަކުގެ ސަބަބުން ރާއްޖެއަށް ޖުމްލަ 36 މެގަވޮޓުގެ އާ ކަރަންޓުގެ ހަކަތަ އުފެއްދުމުގެ ގާބިލިއްޔަތު އިތުރުވެގެންދާނެ ކަމަށް ލަފާކުރެވޭ ކަމަށް ވިދާޅުވިއެވެ.
އެ މަޝްރޫއުތަކަކީ ރާއްޖެއިން އިއާދަކުރަނިވި ހަކަތައިގެ ބޭނުން އިތުރުކުރުމަށް ކުރަމުންދާ މަސައްކަތްތަކުގެ ތެރެއިން މުހިންމު ފިޔަވަޅެއް ކަމަށް ތިމާވެށްޓާއި ބެހޭ ވުޒާރާއިން ވިދާޅުވިއެވެ.
އަދި ސޯލާ ޕީވީ ސިސްޓަމްތައް ބަހައްޓައިގެން، ކަރަންޓު އުފެއްދުމަށްޓަކައި ތެލަށް ބަރޯސާވާ މިންވަރު ކުޑަކުރުމަކީ އެ މަޝްރޫއުތަކުގެ އެންމެ ބޮޑު އެއް މަގުސަދު ކަމަށް ވެސް ވިދާޅުވިއެވެ. އޭގެ ސަބަބުން ތިމާވެއްޓަށް ކުރާ ނޭދެވޭ އަސަރު ކުޑަކުރުމުގެ އިތުރުން، ދިގުދެމިގެންދާނެ ތަރައްގީއަށް މަގުފަހިވެ، ގައުމުގެ އިގްތިސާދަށް ވެސް ފައިދާކުރާނެ ކަމަށް ބެލެވޭ ކަމަށް ވިދާޅުވިއެވެ.
އެ ވުޒާރާއިން ވިދާޅުވީ އެ މަޝްރޫއުތައް ހިންގުމުގެ ސަބަބުން، ހަކަތައިގެ ގޮތުން ރަށްތަކުގެ މިނިވަންކަން އިތުރުވެ، ރައްޔިތުންނަށް ދެމެހެއްޓެނިވި އަދި އިގްތިސާދީ ގޮތުން ފައިދާހުރި ކަރަންޓުގެ ހިދުމަތް ލިބިގެންދާނެ ކަމަށެވެ.
އަދި ފުވައްމުލަކު ސިޓީއާއި އެހެނިހެން ރަށްތަކުގައި އެ ސިސްޓަމްތައް ބަހައްޓައި ނިމުމުން، ރާއްޖޭގެ ކާބަން ފޮރފީޓް ކުޑަކުރުމަށް ބޮޑު އެހީއަކަށް ވެގެންދާނެ ކަމަށް ވިދާޅުވިއެވެ.
