ވެލާނާ އިންޓަނޭޝަނަލް އެއާޕޯޓު (ވީއައިއޭ) އަށް ފުރަން ގޮސް ހުއްޓައި ވަޒަންތަކެއް ފެނިގެން ހައްޔަރު ކުރި ފަތުރުވެރިޔާގެ ބަންދަށް ތިން ދުވަސް ޖަހައިފި އެވެ.
ވީއައިއޭއިން ފުރަން ދިޔަ ފަތުރުވެރިޔެއްގެ އަތުން ވަޒަންތަކެއް ފެނުނު މައްސަލަ ފުލުހުންނަށް ރިޕޯޓު ކުރީ މިދިޔަ ހޮނިހިރު ދުވަހުގެ ހެނދުނު 9:52 ގަ އެވެ.
އެމައްސަލައިގައި ހައްޔަރު ކުރީ ނަމިބިއާއަށް ނިސްބަތްވާ އުމުރުން 60 އަހަރުގެ މީހެކެވެ. ނަމިބިއާ އަކީ އެފްރިކާގެ ގައުމެކެވެ.
ހައްޔަރު ކުރި މީހާގެ ބަންދަށް އިއްޔެ ތިން ދުވަސް ޖަހާފައިވާކަން ފުލުހުން ވަނީ ކަށަވަރު ކޮށްދީފަ އެވެ.
މިމައްސަލައިގައި ހައްޔަރު ކުރި މީހާ އަތުން ފެނުނު ވަޒަންތަކާއިބެހޭ ތަފްސީލެއް ފުލުހުން ހާމައެއް ނުކުރެ އެވެ. އެހެންކަމުން ވަޒަންތައް ރާއްޖެ އެތެރެކުރީ އެމީހާ ކަމެއް ނުވަތަ ރާއްޖެއިން ހޯދައި ބޭރު ކުރަން އުޅުނު ވަޒަންތަކެއްކަމެއް ސާފެއް ނުވެ އެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
