ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުހައްމަދު ނާޒިމް ޖުމްހޫރީ ޕާޓީން ވަކިވެވަޑައިގެންފި އެވެ.
ޖޭޕީގެ ޓިކެޓުގައި މަޖިލީހަށް ހޮވިވަޑައިގެންނެވި ނާޒިމް އެޕާޓީން ވަކިވެވަޑައިގެންނެވީ އާ ސިޔާސީ ޕާޓިއެއް އުފެއްދެވުމަށެވެ. އިއްޔެގެ ވަގުތެއްގައި ތިމަރަފުށީ ދާއިރާގެ މެމްބަރު އަބްދުﷲ ރިޔާޒުވެސް ވަނީ ޖޭޕީން ވަކިވެވަޑައިގެންފަ އެވެ.
ޖޭޕީގެ ލީޑަރު ގާސިމް އިބްރާހިމްއަށް އެޑްރެސް ކުރައްވައި ފޮނުވި ސިޓީއެއްގައި ނާޒިމް ވިދާޅުވީ ޖޭޕީން އިސްތިއުފާ ދެއްވަނީ ސިޔާސީ ޕާޓީއެއް އުފައްދަވައި މިހާރަށްވުރެއް ފުޅާ ދާއިރާއެއްގައި ގައުމަށް ހިދުމަތް ކުރުމަށް ކަމަށެވެ.
ނާޒިމް ޕާޓީއެއް އުފެއްދެވުމަށް 3،000 ސޮއި ހަމަކުރުމުގެ މަސައްކަތް މިހާރު ނިމިފައިވާ ކަމަށް މައުލޫމާތު ލިބެ އެވެ. މި ޕާޓީ އުފައްދަނީ ނާޒިމްގެ އިތުރުން މެމްބަރު ރިޔާޒު އިސްވެ ތިއްބަވަ އެވެ.
ބައެއް މީހުން ކައިރިއަށް ސޮއި ހޯދަން ވަޑައިގެން އާ ޕާޓީ އުފައްދަވަނީ ރައީސް ޔާމީން މިނިވަން ކުރުމުގެ މަސައްކަތް ކުރުމަށްކަމަށް ރިޔާޒު ވިދާޅުވާ ކަމުގެ ވާހަކަތަކެއް ދެކެވުނެވެ. ޕީޕީއެމްއިން ބުނެފައިވަނީ ރައީސް ޔާމީން މިނިވަން ކުރުމަށް އިތުރު ޕާޓީއެއް ނުއުފައްދާނެ ކަމަށެވެ.
ނައިފަރު ދާއިރާގެ މެމްބަރު އަހުމަދު ޝިޔާމް ރޭ ވިދާޅުވީ ނާޒިމް އާ ސިޔާސީ ޕާޓީއެއް އުފައްދަވަނީ ރައީސް އިބްރާހިމް މުހައްމަދު ސޯލިހު ވިދާޅުވެގެން ކަމަށެވެ. އަދި އެއީ ރައީސް ސޯލިހަށް 2023 ވަނަ އަހަރު އެމްޑީޕީގެ ރިޔާސީ ޓިކެޓު ނުލިބިދާނެތީ ކަމަށްވެސް ޝިޔާމް ވިދާޅުވި އެވެ.
