ރާއްޖޭގެ ސިއްހީ ދާއިރާ އިތުރަށް ތަރައްގީ ކުރުމަށް އެހީތެރިކަން ފޯރުކޮށްދިނުމާއި ގުޅޭގޮތުން ކުވައިތު ފަންޑާއިއެކު ދިވެހި ސަރުކާރުން މަޝްވަރާ ކޮށްފި އެވެ.
މިއަދު ބޭއްވި ބައްދަލުކުރެއްވުމުގައި ކުވައިތު ފަންޑުގެ ހާއްސަ ވަފުދާއިއެކު ދިވެހި ސަރުކާރުން ބައިވެރިވެވަޑައިގެންނެވީ ފިނޭންސް މިނިސްޓަރު އިބްރާހިމް އަމީރު އާއި ހެލްތު މިނިސްޓަރު އަހުމަދު ނަސީމް އެވެ.
ފިނޭންސް މިނިސްޓްރީން ބުނީ ސިއްހީ ދާއިރާ ތަރައްގީ ކުރުމާއި ގުޅޭގޮތުން މިއަދު މަޝްވަރާ ކުރެވުނު ކަމަށެވެ.
މިއަދު ދިވެހި ސަރުކާރާއި ކުވެއިތު ފަންޑުން ވަނީ ވެލާނާ އިންޓަނޭޝަނަލް އެއާޕޯޓު (ވީއައިއޭ) ތަރައްގީ ކުރުމަށް 769 މިލިއަން ރުފިޔާގެ ލޯނު އެއްބަސްވުމެއްގައި ސޮއިކޮށްފަ އެވެ.
ކުވައިތު ފަންޑުން މީގެ ކުރިންވެސް ވަނީ ރާއްޖެއަށް އެކި ގޮތްގޮތުން އެހީތެރިކަން ފޯރުކޮށްދީފަ އެވެ. އެގޮތުން 1974 ވަނަ އަހަރު އެންމެ ފުރަތަމަ އެ ފަންޑުން އެހީތެރިވީ މަސްވެރިކަމުގެ ސިނާއަތަށެވެ. އޭގެ ފަހުން ކުވެއިތު ފަންޑުން ވަނީ ތައުލީމީ ދާއިރާއާއި ސިއްހީ ދާއިރާއަށްވެސް އެހީތެރިކަން ފޯރުކޮށްދިނުމަށް މަޝްވަރާކޮށްފަ އެވެ. މި ދެދާއިރާއިން އެހީތެރިކަން ފޯރުކޮށްދޭން އެންމެ ފުރަތަމަ މަޝްވަރާ ކުރީ ކުރީގެ ރައީސް އަބްދުﷲ ޔާމީންގެ ސަރުކާރުގައި 2017 ވަނަ އަހަރު އެވެ.
ރާއްޖެއަކީ އަރަބި ގައުމުތައް ފިޔަވައި ކުވައިތު ފަންޑުން އެންމެ ފުރަތަމަ އެހީތެރިކަން ފޯރުކޮށްދިން ގައުމެވެ.
