ކޮވެކްސް ފެސިލިޓީ މެދުވެރިކޮށް ޖަޕާނުން ރާއްޖެއަށް ކޮވިޑް-19 ވެކްސިން ހަދިޔާކުރަން ނިންމައިފި އެވެ.
ޖަޕާނުން ކޮވެކްސް ފެސިލިޓީއަށް 11 މިލިއަން ވެކްސިން ޑޯޒް ހަދިޔާ ކުރާނެ އެވެ. ރާއްޖެއަށް ފޯރުކޮށްދެނީ އޭގެ ތެރެއިން އަދަދެކެވެ. ރާއްޖެއަށް ހަދިޔާ ކުރަނީ ކޮން ބްރޭންޑެއްގެ ވެކްސިނެއްކަމެއް އަދި ކިހާ އަދަދެއްގެ ވެކްސިނެއްކަން ހާމައެއް ނުކުރެ އެވެ.
ޖަޕާނުން ރާއްޖެއަށް ވެކްސިން ހަދިޔާކުރަން ނިންމި ނިންމުމަށް ފޮރިން މިނިސްޓަރު އަބްދުﷲ ޝާހިދު ވަނީ މަރުހަބާ ވިދާޅުވެފަ އެވެ. ޖަޕާނުގެ ސަރުކާރަށާއި ފޮރިން މިނިސްޓަރު ޓޮޝެމިޓްސު މޮޓެގީ އަށް ޝާހިދު ޝުކުރު އަދާކުރެއްވި އެވެ.
ޝާހިދު ވިދާޅުވީ މިނިންމުމުގެ ސަބަބުން ރާއްޖެއާއި ޖަޕާނާއި ދެމެދު އޮތް ގުޅުން އިތުރަށް ވަރުގަދަ ވެގެން ދާނެ ކަމަށެވެ.
ރާއްޖޭގެ އިތުރުން އިތުރު 9 ގައުމަކަށް ޖަޕާނުން ވެކްސިން ހަދިޔާ ކުރާނެ އެވެ. 11 މިލިއަން ވެކްސިން ޑޯޒް ބަހައިލާނީ މި ގައުމުތަކުގެ މެދުގަ އެވެ.
ޖަޕާނަކީ ތަރައްގީވެފައިވާ ގައުމުތަކުގެ ތެރެއިން އެންމެ ފަހުން ވެކްސިން ދިނުމުގެ ޕްރޮގުރާމު ވެށި އެއް ގައުމެވެ. އެގައުމުގައި ވެކްސިން ދޭން ފެށީ ފެބުރުއަރީ 17 ގަ އެވެ. މިހާތަނަށް އެގައުމުގައި ދިނީ 60 މިލިއަން ވެކްސިން ޑޯޒެވެ.
އެގައުމުގައި ބޭނުންކުރަނީ އެމެރިކާގެ ފައިޒާ އަދި މޮޑާނާ ވެކްސިނެވެ. މީގެ އިތުރުން އިނގިރޭސިވިލާތުގެ އެސްޓްރެޒެނިކާ ވެކްސިންވެސް އަންނަނީ އެގައުމުގައި ދެމުންނެވެ.
ކޮވެކްސް މެދުވެރިކޮށް ޖަޕާނުގެ އިތުރުން އެމެރިކާ އާއި ކެނެޑާއިންވެސް ރާއްޖެއަށް ވެކްސިން ހަދިޔާ ކުރާނެކަން ވަނީ މީގެ ކުރިން އިއުލާން ކޮށްފަ އެވެ.
