އިންޑިއާ ސަރުކާރުން ދޭ ކްރެޑިޓް ފެސިލިޓީގައި ތަރައްގީކުރާ ގަން އިންޓަނޭޝަނަލް އެއާޕޯޓުގެ މަޝްރޫއާއި ގުޅުންހުރި މައުލޫމާތު އިންޑިއާ ހައި ކޮމިޝަނުން ހާމަކުރުމުން އިދިކޮޅުން ކަންބޮޑުވުން ފާޅުކޮށްފި އެވެ.
އައްޑޫ ހައި ކޮމިޝަނުން އިއްޔެ ބުނެފައިވަނީ ގަން އިންޓަނޭޝަނަލް އެއާޕޯޓު ތަރައްގީކޮށް ނިމޭއިރު އެތަނަކީ ސަރަހައްދީ ހަބަކަށް ވެގެން ދާނެ ކަމަށެވެ. އަދި އެ މަޝްރޫއުގެ ތަފްސީލީ މައުލޫމާތާއި ހަރަދުކުރާ ފައިސާގެ އަދަދުވެސް ހައި ކޮމިޝަނުން އާންމު ކުރި އެވެ.
މިކަމާއި ގުޅިގެން މާވަށު ދާއިރާގެ މަޖިލިސް މެމްބަރު މުހައްމަދު ސައީދު ވިދާޅުވީ ބޭރު ޤައުމުތަކުގެ އެހީއާއި ލޯނު މަޝްރޫތަކަށް ބޭނުންކުރުމަކީ ގެއްލުމެއް ވާނެކަމެއް ނޫން ކަމަށެވެ. އެހެންނަމަވެސް މަޝްރޫއުތަކާއި ބެހޭ މަޢުލޫމާތު އެމްބަސީތަކުންނާއި ހައިކޮމިޝަންތަކުން ސަރުކާރަށްވުރެ ކުރިން ހިއްސާކުރާ ނަމަ އިންތިހާބުކޮށްފައިވާ ސަރުކާރެއްގެ ދައުރަކީ ކޮބައިތޯ ސައީދު ސުވާލު ކުރެއްވި އެވެ.
މި ފަހަކަށް އައިސް އިންޑިއާއިން ރާއްޖޭގައި ހިންގާ މަޝްރޫއުތަކާއި އިންޑިއާއިން ދޫކުރާ ލޯނުގެ އެހީގައި ހިންގާ މަޝްރޫއުތަކުގެ މައުލޫމާތުވެސް ހައި ކޮމިޝަނުން ދަނީ އާންމު ކުރަމުންނެވެ. ގިނަ ފަހަރު އެމައުލޫމާތު އިންޑިއާއިން ހާމަ ކުރަނީ ސަރުކާރުންވެސް ތަފްސީލު ހާމަ ކުރުމުގެ ކުރިންނެވެ.
އިންޑިއާއިން އައްޑޫގައި ތަރައްގީ ކުރާ ގަން އިންޓަނޭޝަނަލް އެއާޕޯޓުގެ އިތުރުން ޕޮލިސް އެކެޑަމީ އާއި މަގު ހެދުމުގެ މަޝްރޫއުގެ މައުލޫމާތުވެސް ހައި ކޮމިޝަނުން މީގެ ކުރިން އިއުލާން ކުރި އެވެ. ގަން އެއާޕޯޓު ތަރައްގީ ކުރަނީ ރާއްޖެއަށް އިންޑިއާ ސަރުކާރުން ދޫކުރާ 800 މިލިއަން ޑޮލަރުގެ ލައިން އޮފް ކްރެޑިޓްގެ ތެރެއިންނެވެ.
