އެމްޑީޕީގެ އާ އިއްތިހާދަށް ޕީޕީއެމްއަށް ނިސްބަތްވާ މެމްބަރުންގެ ތާއީދު ހޯދުމުގެ މަސައްކަތް އެމްޑީޕީގެ ލީޑަޝިޕުން ފަށައިފި އެވެ.
ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް އިއްޔެ ވަނީ އެމްޑީޕީއަށް އާ އިއްތިހާދެއް ހަދަން ޖެހިފައިވާ ކަމަށާއި އެކަމަށްޓަކައި "އިންޑިއާ އައުޓު" ނުގޮވާ، ނަފުރަތުގެ ބިލަށް ތާއީދު ކުރާ، މިޔުޒިކު ހަރާމް ނުކުރާ އަދި ކީރިތި ރަސޫލާ އަށާއި ދީނަށްވެސް ފުރައްސާރަ ނުކުރާ ބަޔަކު ބޭނުންވާކަމަށް ވިދާޅުވެފަ އެވެ. އަދި ޕީޕީއެމްއާއި އެމްޑީޕީގެ ގިނަ މެމްބަރުންވެސް އެކަމަށް އިއްތިފާގު ވާނެ ކަމަށް ނަޝީދު ވިދާޅުވި އެވެ.
އެމްޑީޕީގެ ޗެއާޕާސަން ހަސަން ލަތީފު މިއަދު ވަނީ މި މޭރުމުން ވާހަކަފުޅު ދައްކަވައިފަ އެވެ. އެގޮތުން ވިދާޅުވީ ކޮރަޕްޝަނާއި، ވައްކަމާއި، ހަރުކަށި ފިކުރު "އޯކޭ" ނޫން އެތައް ބަޔަކު އެމްޑީޕީއާއި ޕީޕީއެމްގެ މެމްބަރުންގެ ތެރޭގައިވެސް ތިބިކަމަށެވެ. އަދި އުއްމީދު ތަކަކާއި އުސޫލުތަކެއް އެމްޑީޕީގައި ވާ ކަމަށާއި ބޭނުންވަނީ ކާބަފައިން އުޅުނި ރީތި އިސްލާމް ދީނުގައި ތިބެން ކަަމަށް ހަސަން ލަތީފު ވިދާޅުވި އެވެ.
"އެއީ ރާއްޖެ އަފްގާނިސްތާނަކަށް ނުވެ ސަލާމަތް ވާން އޮތް މަގު"
- ހަސަން ލަތީފު
ހަސަން ލަތީފު މި އިޝާރާތް ކުރެއްވީ ރާއްޖޭގައި ހަރުކަށި ފިކުރު ފުޅާ ދާއިރާއެއްގައި ފެތުރި އިންތިހާއަށް އާންމުވެފައިވާތީ އޭގެ ސަބަބުން ހަނގުރާމަމަތީ ލަޝްކަރެއް އުފެދުމުގެ ބިރު އޮތްކަމަށް ސަލާމަތީ ބާރުތަކުންވެސް ބުނެފައި ވަނިކޮށެވެ.
ރައީސް ނަޝީދު ވިދާޅުވި ގޮތުގައި މިވަގުތު އެންމެ އިސްކަމެއް ދެއްވައިގެން ކުރައްވާނެ މަސައްކަތަކީ ދެވަނަ އަފްގާނިސްތާނަކަށް ރާއްޖެ ވިޔަ ނުދީ ހަރުކަށި ފިކުރު ނައްތައިލުމުގެ މަސައްކަތެވެ. އަދި އެކަމަށް ރައީސް އިބްރާހިމް މުހައްމަދު ސޯލިހުގެ އެއްބާރުލުން ލިބިނުލައްވާ ކަމަށް ނުސީދާކޮށް ވިދާޅުވެ ރައީސް ސޯލިހާއިއެކު ސިޔާސީ ގޮތުން ހުންނެވެން ނެތްކަަން ނަޝީދު އިއުލާން ކުރެއްވި އެވެ.
ބޭނުންވަނީ ނަފުރަތުގެ ބިލަށް ތާއީދު ކުރާ އިންޑިއާ އައުޓު ނުގޮވާ ބަޔަކު: ނަޝީދު
އެމްޑީޕީގެ ތެރޭގައިވެސް ހަރުކަށި ފިކުރު އޮތްކަމުގެ ތުހުމަތު ނަޝީދު ކުރެއްވި އެވެ. އަދި ރައީސް ސޯލިހު ހުންނެވީ އޭގައި ތާށިވެފައިކަމަށްވެސް ވިދާޅުވި އެވެ. އަދި ވިދާޅުވީ ރައީސް ޔާމީންގެ އެހީތެރިކަމަށް އެދިވަޑައިގަންނަވާނެ ކަމަށެވެ.
ނަޝީދުގެ ހުށަހެޅުމާއި ގުޅިގެން ޕީޕީއެމްއިން ބުނީ ނަޝީދާއި، އެމްޑީޕީއާއިއެކު ސިޔާސީ ގޮތުން މަސައްކަތްކުރުމުގެ އެއްވެސް ވިސްނުމެއް ނެތްކަމަށެވެ. އެހެންނަމަވެސް ސަރުކާރާއި ދެކޮޅުކަން ވަރަށް ސާފުކޮށް ޕީޕީއެމްއިން ހާމަކުރި އެވެ.
ނަޝީދުގެ ވާހަކަފުޅުތަކަށް ރައީސް ސޯލިހުވެސް ދެއްވީ ބީރު ކަންފަތެކެވެ. މިހާތަނަށް މިއިން އެއްވެސް ކަމަކާއި ގުޅިގެން ރައީސް ސޯލިހު އެއްޗެއް ވިދާޅުވެފައި ނުވާއިރު ރައީސް އޮފީހުގެ ތަރުޖަމާނު މަބުރޫކު އަޒީޒު ވިދާޅުވީ ރައީސް ފޯކަސް ކުރައްވަނީ ރިޔާސީ ވައުދުތައް ފުއްދެވުމަށް ކަމަށެވެ. މިއީ ފަހަކަށް އައިސް ސިޔާސީ މަޝްރަހުގައި ހިނގާ ކޮންމެ ކަމަކަށްވެސް ރައީސްގެ ޖަވާބުކަން ފާހަގަކޮށްލެވެ އެވެ.
