ރާއްޖޭގައި ބޮޑެތި ހަމަނުޖެހުންތަކެއް އުފެދިފައިވާ ކަމަށާއި އޭގެ އަސްލަކީ ދައުލަތުގެ ވެރިން މަސައްކަތް ކުރަންޖެހޭ ގޮތަށް މަސައްކަތް ނުކުރެވުން ކަމަށް ކުރީގެ މިނިސްޓަރު އަބްދުﷲ ކަމާލުއްދީން ވިދާޅުވެއްޖެ އެވެ.
ކަމާލުއްދީން މިފަދައިން ވިދާޅުވީ ރާއްޖޭގެ ލޯކަލް ޓީވީ ޗެނަލެއްގެ ޕްރޮގުރާމެއްގައި ވާހަކަ ދައްކަވަމުންނެވެ. ކަމާލުއްދީން ދާދި ފަހުން ވަނީ ގައުމީ އެއްބައިވަންތަކަމުގެ ޕާޓީ ނުވަތަ މޯލްޑިވްސް ސޮލިޑޭރިޓީ ޕާޓީގެ ނަމުގައި އަމިއްލަ ސިޔާސީ ޕާޓީއެއް އުފެއްދެވުމުގެ މަސައްކަތް ފައްޓަވައިފަ އެވެ.
އަމިއްލަ ޕާޓީއެއް އުފެއްދެވުމާއި ގުޅޭގޮތުން ވާހަކަަ ދައްކަވަމުން ކަމާލުއްދީން ވިދާޅުވީ ރާއްޖޭގެ ސިޔާސީ މަޝްރަހުގައި ހައްލު ކުރަންޖެހިފައިވާ އެތައް ކަމެއް އެބަ ހުރި ކަމަށެވެ. ކަންކަން ހައްލު ނުކުރެވި އޮންނަ އޮތުމުގެ ސަބަބުން ގައުމުގައި ނަފުރަތު އާންމުވެ ހަސަދަވެރިކަން އިތުރުވަމުން ދާކަމަށް އޭނާ ވިދާޅުވި އެވެ.
ކަމާލުއްދީން ވިދާޅުވީ މައްސަލަތައް ހައްލު ނުކުރެވެނީ އޭނާ ދެކިލައްވާ ގޮތުގައި ދައުލަތުގެ ބާރުތަކުގައި ތިއްބެވި ބޭފުޅުންނަށް ކުރިއަށް ގެންދަންވީ ގޮތަށް ކަންކަން ކުރިއަށް ނުގެންދެވިގެންނެވެ.
އެންމެ މުހިންމު ކަމަކީ އަދި ހިތާ ކުޅޭ އެއްޗަކީ އިސްލާމް ދީން ކަން ފާހަގަކުރައްވައި ކަމާލުއްދީން ވިދާޅުވީ އިސްލާމް ދީން މިފަސްގަނޑުން ފޮހެވިގެން ދާން އެންމެ ހީނުކުރާ މީހުންވެސް ބޭނުން ނުވާކަމަށެވެ. އެހެންނަމަވެސް މި ހާލަތު ބަދަލުވަމުންދާ މަންޒަރު ފެންނަކަމަށްވެސް އޭނާ ވިދާޅުވި އެވެ.
އިންޑިއާ އައުޓުގެ ނަމުގައި ސޯޝަލް މީޑިއާގައި ހިންގާ ކެމްޕެއިނާއި ގުޅޭގޮތުން ކަމާލުއްދީން ވިދާޅުވީ އަވައްޓެރިންނާ ދެކޮޅަށް ނިކުންނަން ގައުމުގެ ދެބައިކުޅަ އެއްބައި ރައްޔިތުން ނިކުންނަން ތައްޔާރަށް ތިބިކަމަށެވެ. ކަންބޮޑުވުން ފާޅު ކުރައްވަމުން ވިދާޅުވީ ދިވެހިންނަށް ރައްކާތެރިކަމާއިއެކު އުޅެވެން ޖެހޭނެ ކަމަށާއި އެކަމަށް އަވައްޓެރިންގެ ހިމާޔަތްވެސް ލިބޭނެ ކަމަށެވެ.
ކަމާލުއްދީން އަކީ ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގައި ހޯމް މިނިސްޓަރު ކަމާއި ފިޝަރީޒް މިނިސްޓަރުކަންވެސް ކުރެއްވި ބޭފުޅެކެވެ. އޭގެ ފަހުން ޖުމްހޫރީ ޕާޓީގައި ދުވަސްތަކެއް ހޭދަކުރެއްވުމަށްފަހު، އެމްއާރުއެމް އުފެއްދުމުގައި އަނެއްކާވެސް ކަމާލުއްދީން ހުންނެވީ މައުމޫނާއިއެކު އެވެ.
ކަމާލުއްދީން ވިދާޅުވި ގޮތުގައި އޭނާ އަމިއްލަ ޕާޓީއެއް އުފައްދަވަނީ ސިޔާސީ ކަންކަމާއިމެދު އެހެން ނަޒަރަކުން ދެކުމުގެ ބޭނުމުގަ އެވެ. އެގޮތުން މިހާރު ހިނގާ ނުރަނގަޅު ކަންކަމާއި މެދު ފިކުރުކުރާ އެތައް ރައްޔިތުންނެއް އުޅޭކަމަށް ގަބޫލު ކުރައްވާ ކަމަށާއި އެއީ އާ ޕާޓީގެ މައިގަނޑު ބޭނުންކަމަށް އޭނާ ވިދާޅުވި އެވެ.
