ކިލޯއަކަށް ވުރެ ގިނަ މަސްތުވާތަކެއްޗާއި، އެ ތަކެތި ޕެކްކުރަން ގެންގުޅޭ ސާމާނުތަކާއެކު، ދިވެހި ފިރިހެނަކާއި ބިދޭސީ ފިރިހެނަކު މާލޭން ހައްޔަރުކޮށްފިއެވެ.
ފުލުހުން ބުނީ މަސްތުވާތަކެތި ބޭނުންކޮށް، ގެންގުޅެ، އެ ތަކެތީގެ ވިޔަފާރިކުރާ ކަަމުގެ ތުހުމަތުގައި ހައްޔަރުކޮށްފައި ވަނީ ގއ. ވިލިނގިލި، އެދުރުގެ، މުޙައްމަދު ފައުޒާން، 35، އާއ އާއި ބަންގްލަދޭޝް އަށް ނިސްބަތްވާ ޒާކިރު ހޮސައިން، 29، ކަމަށެވެ.
އެ ދެ މީހުން ހައްޔަރުކޮށްފައި ވަނީ ކައުންޓަ-ނާކޮޓިކްސް އިންޓެލިޖެންސާއި ކައުންޓަ-ނާކޮޓިކްސް އޮޕަރޭޝަން ގުޅިގެން، މި މަހުގެ 7 ގައި ހިންގި އޮޕަރޭޝަނެއްގަ އެވެ.
މި މައްސަލައާ ގުޅިގެން ހައްޔަރުކުރި އެ ދެ މީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ޒާކިރުގެ ބަންދަށް 15 ދުވަސް އަދި ފައުޒާންގެ ބަންދަށް 10 ދުވަސް ޖަހާފައިވެ އެވެ.
މި މައްސަލަ ފުލުހުން ދަނީ ތަހުގީގުކުރަމުންނެވެ.
