މިދިޔަ އަންގާރަ ދުވަހުގެ ރޭ އެސްއެމްއީޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) ގެ ހެޑް އޮފީހަށް ވަދެ ވައްކަން ކުރަން މަސައްކަތް ކުރި ނަަމަވެސް ލޯން އެޕްލިކޭޝަންތައް ރައްކާތެރިކަމާއިއެކު އެބަހުރި ކަމަށް އެ ބޭންކުން ބުނެފި އެވެ.
އެސްޑީއެފްސީން އިއްޔެ ނެރުނު ބަޔާނެއްގައި ބުނީ ވައްކަން ކުރަން ބަޔަކު މަސައްކަތް ކުރިއިރު އެ ބޭންކުގެ ބައެއް ހަރު މުދަލަށް ގެއްލުން ދީފައިވާ ކަމަށެވެ. އެހެންނަމަވެސް އެއްވެސް ފައިސާއެއް އަދި ލޯނު އެޕްލިކޭޝަނަކުންވެސް ވައްކަން ކޮށްފައި ނުވާކަމަށް ބޭންކުން ބުންޏެވެ.
އެސްޑީއެފްސީން ވަނީ ސްޓިމިއުލަސް ލޯނު ޕެކޭޖުތަކަށް އެދުމަށް ހުޅުވާލައިފަ އެވެ. އެހެންކަމުން މިދުވަސްވަރު ގިނަ ބަޔަކު ދަނީ އަމިއްލަ އެތައް މައުލޫމާތެއް ހިމެނޭ ލޯނު އެޕްލިކޭޝަންތައް ބޭންކަށް ހުށަހަޅަމުންނެވެ.
އެސްޑީއެފްސީން ބުނީ އާންމު ފަރާތްތަކުން އެ ބޭންކާއި ހިއްސާ ކޮށްފައިވާ ލިޔެކިޔުންތައް ރައްކާތެރިކަމާއިއެކު ބަލަހައްޓަމުންދާނެ ކަމުގެ ޔަގީންކަން އަރުވާ ކަަމަށެވެ.
އެސްޑީއެފްސީން ވައްކަން ކުރަން އުޅުނު މައްސަލަ ފުލުހުން ދަނީ ތަހުގީގު ކުރަމުންނެވެ. އެ ބޭންކުން ބުނީ ތަހުގީގަށް އިތުރު މައުލޫމާތު ލިބެމުން ދާވަރަކަށް އެކަން ހިއްސާ ކުރަމުން ގެންދާނެ ކަމަށެވެ.
