ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އުޅުއްވަނީ އަމިއްލަ ފައިދާ ހޯއްދަވަން ކަމަށް ވިދާޅުވެ އަދާލަތު ޕާޓީން އިއްޔެ ނެރުނު ބަޔާނާއި ގުޅިގެން ނަޝީދު ދިފާއު ކުރައްވައި ކުރީގެ ބަންޑާރަނައިބު ދިޔާނާ ސައީދު އަދާތަލު ޕާޓީއަށް ރައްދު ދެއްވައިފި އެވެ.
ސަރުކާރު ކޯލިޝަންގައި އަދާލަތު ޕާޓީ އޮވެ ރައީސް އިބްރާހިމް މުހައްމަދު ސޯލިހުގެ ނިންމެވުންތައް ނިންމަވަނީ އަދާލަތުން ބޭނުންވާ ގޮތަށްކަމަށް ވިދާޅުވެ ރައީސް ނަޝީދު އިއްޔެ ވަނީ ބަޔާނެއް ނެރެފަ އެވެ. އެ ބަޔާނަށް ރައްދު ދީ އަދާލަތު ޕާޓީންވެސް ވަނީ ބަޔާނެއް ނެރެފަ އެވެ. ނަޝީދު ބޭނުންފުޅުވަނީ ފަރުދީ އުއްމީދުތަކެއް ކުރިއަށް ނެރެ އެކަން ގައުމީ މައްސަލައަކަށް ހައްދަވަން ކަމަށް އަދާލަތުން ބުންޏެވެ.
އަދާލަތުގެ ވާހަކަތަކައް ރައްދު ދެއްވައި ދިޔާނާ ވަނީ އެޕާޓީގެ ރައީސް އިމްރާން އަބްދުﷲ ގެ މައްޗަށް ޖިންސީ ފުރައްސާރައިގެ ތުހުމަތު ކުރެވުނު ހިނދު އެތުހުމަތު އުފުލި އަންހެން މުވައްޒަފު ވަޒީފާއިން ވަކި ކުރިކަމަށް ވިދާޅުވެފަ އެވެ. ހޯމް މިނިސްޓަރު ކަމުގައި ހުންނެވި އިމްރާން މަގާމުގެ ނުފޫޒު ބޭނުން ކުރައްވައިގެން ފަހުން ކައިވެނިބައްލަވައިގަތް އަނބިކަނބަލުންނަށް ދައުލަތުގެ ވުޒާރާއެއްގެ އިސް މަގާމެއް ދެއްވާފައިވާ ކަމަށްވެސް ދިޔާނާ ވިދާޅުވި އެވެ.
"އަމިއްލަ ފައިދާއަށް އުޅުއްވަނީ ކާކުކަން ސާފުތޯ"
- ދިޔާނާ ސައީދު
ހޯމް މިނިސްޓަރު އިމްރާންް ވަނީ މަގާމަށް އިސްވެވަޑައިގެންނެވި ފަހުން ކައިވެންޏެއް ބައްލަވައިގެންފަ އެވެ. އަނބިކަނބަލުން ހުންނެވީ ޖެންޑާ މިނިސްޓްރީގެ ނައިބު ކަމުގެ މަގާމުގަ އެވެ. ފާތިމަތު ޔުމްނާއާއި އިމްރާން ކައިވެނިބައްލަވައިގަތީ މިދިޔަ އަހަރުގެ މާޗުު މަހުގެ ތެރޭގަ އެވެ.
ދިޔާނާ އިތުރަށް ވިދާޅުވީ ކޯލިޝަން ޕާޓްނަރެއްނަމަ އެމީހެއްގެ މައްސަލަ ފުލުހުންނަށް ހުށަހެޅިނަމަވެސް އެކަން ހިނގާގޮތެއް ނުވާކަމަށެވެ. އެއިން ބޭކަލަކު މީހަކަށް ކިތަންމެ ފަދަ ބޮޑު ގެއްލުމެއް ދިންނަމަވެސް އޭގެ މަތީގައި އަތް އަޅުއްވައިގެން އިންނަވައި މި ކިޔުއްވަނީ ކޮން އަމިއްލަ ފައިދާއެކޭތޯއޭ ވިދާޅުވެ ދިޔާނާ އަދާތަށާއި އިމްރާނަށް ވަރަށް ބޮޑަށް ފާޑުވިދާޅުވި އެވެ.
ރައީސް ނަޝީދު، ރައީސް ސޯލިހުގެ ސަރުކާރަށް ތާއީދުކުރައްވަން އުނދަގޫކަމަށް ވިދާޅުވީ ދާދި ފަހުން ސަރުކާރުން ސްޕޮންސާ ކޮށްގެން މަޖިލީހަށް ހުށަހެޅި ނަފުރަތު ފެތުރުން ހުއްޓުވުމުގެ ބިލަށް ސަރުކާރުގެ ތާއީދު ނެތްކަމަށް ހާމަކުރެއްވުމުންނެވެ. ނަޝީދު ތުހުމަތު ކުރައްވާ ގޮތުގައި ރައީސް ސޯލިހު އަމިއްލަފުޅު ސަރުކާރުން ހުށަހެޅި އެ ބިލަށް ތާއީދު ނެންގެވީ އަދާލަތު ޕާޓީގެ ނުފޫޒުންނެވެ.
